• USD 1,7000 0,00% EUR 1,9008 +0,29%
    • GBP 2,1523 +0,13% RUB 0,0262 -0,76%

Prezident İlham Əliyevin son 1 illik fəaliyyəti: islahatların miqyası və xalqın reaksiyası

Prezident İlham Əliyevin son 1 illik fəaliyyəti: islahatların miqyası və xalqın reaksiyası

Bu, bir həqiqətdir ki, ölkəmizdə siyasi sabitlik və innovativ inkişafın, davamlı iqtisadi yüksəlişin, nizami və güclü ordu quruculuğu prosesinin, demokratik islahatların, müasirləşmənin, ugurlu xarici siyasətin və pozulmuş ərazi bütövlüyümüzün bərpası naminə fədakar mübarizənin təşəbbüskarı və təminatçısı Prezident İlham Əliyevdir.

Publika.az xəbər verir ki, bu sözləri millət vəkili, Azərbaycan Respublikasının Prezidenti yanında Dövlət İdarəçilik Akademiyasının Siyasi Araşdırmalar İnstitutunun direktoru Elman Nəsirov Prezident İlham Əliyevin son 1 illik fəaliyyətindən danışarkən deyib.

Millət vəkili bildirib ki, möhtərəm prezidentimizin qazandığı bütün uğurların kökündə Heydər Əliyev siyasətinə sadiqlik və onun dünyanın yeni geosiyasi reallıqları kontekstində kreativ və innovativ yanaşmalarla davam etdirilməsi kursu dayanır:

“Azərbaycanı son 16 il ərzində məhz Prezident Ilham Əliyevin məqsədyönlü, sistemli, düşünülmüş və müdrik siyasəti sayəsində sabitlik və təhlükəsizlik adasına çevrilmişdir. Xalq öz prezidentinə inanır və onu dəstəkləyir. Prezident də ayrı-ayrı beynəlxalq siyasi dairələrin və dövlətlərin diqtəsi ilə deyil, məhz Azərbaycan xalqının milli mənafeyindən irəli gələn bir müstəqil siyasət həyata keçirir. İqtisadi müstəqilliyimiz siyasi müstəqilliyimizi şərtləndirir. Azərbaycanı milli dövlətçilik maraqlarımıza uyğun gəlməyən heç bir beynəlxalq kampaniya və macəralara cəlb etmək mümkün deyildir.
Azərbaycanın möhtəşəm uğurlarını şərtləndirən bu siyasi kurs 2018-ci il 11 aprel prezident seçkilərində növbəti dəfə xalqın mütləq əksəriyyətinin səsini qazanaraq prezident seçilmiş cənab İlham Əliyev tərəfindən son 1 il ərzində yeni məzmunla zənginləşdirilmişdir. Başqa sözlə, dövlət başçısının təşəbbüsü ilə prezident seçkilərindən sonra ölkəmizdə islahatların yeni mərhələsinə keçidin anonsu verilmiş və 2019-cu ilin əvvəlindən başlayaraq sosial-iqtisadi sferada köklü və sistemli dəyişikliklərə başlanılmışdır. Bu islahatlar küll halında xalqımızın sosial rifahının yüksəlməsi mənafeyinə xidmət göstərir. Başqa cür ola da bilməz. Cənab Prezident dəfələrlə öz çıxışlarında qeyd edib ki, bütün siyasətimizn mərkəzində Azərbaycan vətəndaşı və onun sosial rifahı dayanır. Sözü ilə əməli hər zaman üst-üstə düşən Prezident İlham Əliyev sosial paketdən olan yeni islahatlar kursu ilə növbəti dəfə təsdiqlədi ki, o, hər bir Azərbaycan vətəndaşının prezidentidir.

Eyni zamanda xüsusi həssas kateqoriyadan olan insanlar: şəhid ailələri, müharibə veteranları və müharibə əlilləri, məcburi köçkün və qaçqınlar dövlət başçısının böyük qayğısı ilə əhatə olunmuşlar. Bu baxımdan cari ilin 28 yanvar tarixində Prezident İlham Əliyevin şəhid ailələri ilə keçirdiyi görüş həmin qayğının bariz nümunəsidir. Bu görüşdə “ Xalqa xidmət mənim ən böyük vəzifədir. Mənim üçün bu, böyük şərəfdir”, -deyən dövlətimizin rəhbəri elə həmin gün imzaladığı fərmanla şəhid ailələri üçün birdəfəlik ödəmənin (11 min manat) verilməsi prosesinin əhatə dairəsini genişləndirdi. 1997-ci il 2 avqustadək şəhid olmuş əlavə 2725 şəhid ailəsinə də həmin vəsaitin verilməsi nəzərdə tutuldu. Bunlardan 2264 şəhid hərbi qulluqçu və 461 şəhid polisin vərəsəsi də 11 min manatdan az sığorta ödənişi aldığı üçün həmin siyahıya əlavə olundu. Bununla da birdəfəlik ödənişin verilməsi prosesi artıq 12.268 şəhid vərəsəsini əhatə edir. Bu məqsədlə dövlət büdcəsindən 135 milyon manat vəsait ayrılmışdır.
Cənab İlham Əliyevin cari ilin 30 yanvar tarixində imzaladığı və şəhid ailələrinə dövlət qayğısının artırılmasını ehtiva edən Fərmanı 12 mindən çox şəhid ailəsini əhatə etmişdir. Fərmana əsasən, 2019-cu ilin 1 fevral tarixindən etibarən şəhid ailələrinə verilən aylıq təqaüdün məbləğı 58 manat artırılaraq 300 manata çatdırılmışdır. Ümumən, 2007-ci ildən şəhid ailələri üçün Azərbaycan Respublikası Prezidentinin ayliq təqaüdünün məbləği 3 dəfə artırılmışdır.

Prezident İlham Əliyevin bu ilin 28 yanvar tarixində imzaladığı digər fərmanla isə şəhid ailələri və Qarabağ müharibəsi əlilləri üçün mənzillərin alınması məqsədilə 35 milyon manat vəsait ayrılmışdır. Yeri gəlmişkən onu da xüsusi olaraq qeyd edək ki, ötən dövrdə Prezident İlham Əliyevin təşəbbüsü ilə şəhid ailələrinə və müharibə əlillərinə 6654 mənzil, o cümlədən 2018-ci ildə nəzərdə tutulduğundan 3 dəfə çox olmaqla 626 mənzil verilmişdir. Cari ildə isə bu kateqoriyadan olan insanlara azı 800 mənzilin verilməsi nəzərdə tutulur.
Prezident İlham Əliyevin dərin sosial yönümlü islahatları öz əhatə dairəsini genişləndirməkdədir. Cari ilin 1 mart tarixində mədəniyyət və incəsənət xadimlərinin bir qrupu ilə görüşündə cənab Prezidentin qeyd etdiyi kimi, minimum əmək haqqının və minimum pensiyanın təxminən 40% artması nəticə etibarilə 830 minə yaxın insanı əhatə etmişdir. Sosial müavinətlərin orta hesabla 100% artırılması təqribən 600 min insana şamil edilmişdir. Çoxmənzilli binaların sənədləşdirilməsi isə təxminən 350-400 min nəfər insanın bu sahədə mövcud problemlərinin birdəfəlik həllinə gətirib çıxaracaqdır. Bundan savayı, tələbələrin təqaüdlərinin artırılması ilə təxminən 100 mindən çox tələbənin maliyyə vəziyyətinin yaxşılaşdırılması təmin edilmişdir.

Prezident İlham Əliyevin 25 fevral 2019-cu il tarixində imzaladığı “Əhalinin sosial müdafiəsinin güclədirilməsi sahəsində əlavə tədbirlər haqqında” Sərəncama əsasən hər üç qrupdan olan əlillərə (I qrup əlillər-150 manat, II qrup əlillər-130 manat, III qrup əlillər-110 manat) və müharibə əlillərinə (I qrup müharibə əlilləri-250 manat, II qrup müharibə əlilləri-230 manat, III qrup müharibə əlilləri-210 manat), valideynlərini itirmiş və valideyn himayəsindən məhrum olmuş uşaqların qəyyumlarına (100 manat), 5-dən yuxarı uşağı olan qadınların hər uşağı üçün (55 manat), uşağın anadan olmasına görə (200 manat), dəfn üçün (300 manat), I qrup əlillər və ya sağlamlıq imkanları məhdud 18 yaşadək şəxslərə qulluq edənlərə (50 manat ) müvafiq olaraq verilən müavinət və Azərbaycan Respublikasının təqaüdü 2019-cu ilin 1 aprel tarixindən artırılmışdır.
Prezident İlham Əliyevin cari ilin 28 fevral tarixində imzaladığı və problemli kreditlər məsələsinin həllini özündə ehtiva edən Fərmani çox ciddi sosial təşəbbüs olmaqla cəmiyyət daxilində böyük müsbət rezonans doğurmuşdur. Fərman təxminən 800 min insanı əhatə edir. Dövlətimizin rəhbəri insanları ciddi narahat edən bu problemin həlli məsələsinin əhəmiyyəti haqqında bəhs edərkən haqlı olaraq vurğulamışdır ki, “Bu fərmanın dünyada analoqu yoxdur. Dövlət bir daha göstərdi ki, vətəndaşının yanındadır. Ciddi devalvasiyadan əziyyət çəkən ölkələrin sayı kifayət qədər çoxdur və bizdən də dərin devalvasiyaya uğramış ölkələr vardır. Ancaq heç bir ölkədə bu dərəcədə sosialyönümlü və vətəndaşın marağını güdən addım olmamışdır. Yəni bütün bu sosial paket təqribən 3 milyona yaxın insanı əhatə edir və bir daha bizim niyyətimizi göstərir.”

Beləliklə, Prezident İlham Əliyevin 15 il ərzində davamlı olaraq həyata keçirdiyi islahatlar kursu son bir il ərzində yeni mərhələyə daxil olmaqla ölkəmizdə ictimai-siyasi və sosial-iqtisadi sabitliyi daha da möhkəmləndirmiş, səfərbər olunmuş cəmiyyət formalaşdırmış, vətəndaş həmrəyliyini şərtləndirmiş, ən əsası isə xalq-hakimiyyət birliyini monolit qüvvəyə çevirmişdir. Bu reallıqları dünyanın ən nüfuzlu reytinq agentlikləri də təsdiqləməkdədirlər. Bu baıxmdan Fransanın tanınmış “Opinion Way” sosial tədqiqatlar kompaniyasının cari ilin fevral-mart aylarında Azərbaycan ərazisində (Naxçıvan Muxtar Respublikası istisna olmaqla) keçirdiyi sorğuda ölkədə ictimai-siyasi və sosial-iqtisadi sabitliyin qorunmasında Prezident İlham Əiyevin rolu, həyata keçirdiyi sosial-iqtisadi islahatlar kursu, kadr islahatları, regionların inkişafı istiqamətində atdığı addımlar, xarici siyasət kursu ilə bağlı respondentlərə suallar ünvanlanmışdır. Bu sorğunun nəticələri ilə bağlı “Opinion Way” şirkətinin rəhbəri aprel ayının 9-da Beynəlxalq Mətbuat Mərkəzində mətbuat konfransı keçirmişdir. Həmin nəticələrə görə, respondentlərin 80,1%-i ölkədəki mövcud ictimai-siyasi və sosial-iqtisadi sabitliyin qorunması və möhkəmləmdirilməsini Prezident İlham Əliyevin fəaliyyətinin ən böyük uğuru kimi dəyərləndirmişdir. “Prezident İlham Əliyevin son 1 illik fəaliyətini necə qiymətləndirirsiniz” sualına sorğuda iştirak edənlərin 85,1%-i müsbət cavab vermişdir. Yalnız 6,8% “mənfi”, 8,1% isə “bilmirəm” kimi cavablandırmışdır”.

Azərbaycanda həyata keçirilən sosial-iqtisadi fəaliyyəti və bu sahədə Prezident İlham Əliyevin son ildə apardığı islahatları necə qiymətləndirirsiniz” sualına respondentlərin 90,5%-i ümumən müsbət cavab vermişdir. Prezident İlham Əliyevin seçkiqabağı verdiyi vədlərini yerinə yetirməsi vəziyyəti ilə bağlı suala sorğu iştirakçılarının 75,6 %-i müsbət cavab vermişdir. Əks mövqedə dayananların faizi cəmisi 5,8% təşkil etmişdir. 4,2% isə cavab verməkdə çətinlik çəkdiyini söyləyib.

Respondentlərin 90,4 %-i Prezident İlham Əliyevin regionların inkişafı ilə bağlı siyasətini bəyəndiyini bildirib.
Sorğu iştirakçılarının 89,9 %-i dövlət başçısının xarici siyasət kursunu müsbət qiymətləndirib.
Beləliklə, Fransanın nüfuzlu “Opinion Way” sorğu kompaniyasının və öz fəaliyətində şəffaflığı, dürüstlüyü, peşəkarlığı və obyektivliyi əsas götürən digər beynəlxalq reytinq qurumlarının ümumi rəyi bu qənaətə gəlməyə əsas verir ki. Azərbaycanda ictimai-siyasi və sosial-iqtisadi sabitliyin, vətəndaş həmrəyliyinin, səfərbər olunmuş cəmiyyətin, sosial-iqtisadi, siyasi və məhkəmə-hüquq sistemində köklü islahatların təşəbbüskarı və qarantı Prezident İlham Əliyevdir. Məhz möhtərəm Prezidentimizin müəyyən etdiyi müstəqil və milli maraqlara söykənən həm daxili, həm də xarici siyasət kursu Azərbaycanın bütün uğurlarını şərtləndirir və onun davamlılığını təmin edir. Eyni məntiqlə yanaşdıqda növbəti qənaətimiz hasil olur. Həmin qənaətə görə, əgər bu gün ölkəmizdə prezident seçkiləri keçirilsəydi, cənab İlham Əliyev xalq sevgisi və etimadının nəticəsi olaraq 1 il öncə qazandığı 86,03%-lik nəticəni üstələyə bilərdi. Cənab Prezidentin atdığı addımların miqyası və xalqın reaksiyası bu qənaətə gəlməyə əsas verir.

loading...

Xəbər lenti

DAHA ÇOX XƏBƏR