Paşinyan 5 illik iqtisadi inqilabi dəyişikliyə nail olmaq üçün... - DEPUTAT

Bu gün Ermənistan parlamenti düşdüyü iqtisadi fəlakətdən xilas olmağın yollarını axtarmaq üçün parlamentdə müzakirəyə başlayıb. Onlar bu 5 illik proqramına “iqtisadi inqilab” adını veriblər.

Publika.az xəbər verir ki, bu fikirləri Milli Məclisdə çıxışı zamanı deputat Elman Nəsirov deyib.

Onun sözlərinə görə, bu proqrama əsasən ildə Ermənistan iqtisadiyyatında 5 faiz artım baş verməlidir: “Ancaq iş ondadır ki, Ermənistan mediası bu proqramı tənqid edir. Özləri qeyd edirlər ki, hansı resursla, maliyyə və investisiya ilə iqtisadi inqilab etmək mümkündür? Ermənilər açıq qeyd edirlər ki, yaranan vəziyyət Azərbaycanın bu ölkəyə qarşı tətbiq etdiyi iqtisadi və nəqliyyat blokadasının təsirindən yaranıb. Belə olduğu təqdirdə, fikirlər səsləndirilir ki, Qarabağ danışıqları ətrafında yeni situasiya yaranıb. Aydındır ki, Paşinyan 5 illik iqtisadi inqilabi dəyişikliyə nail olmaq üçün Azərbaycan torpaqlarını işğaldan azad etməlidir. Əks təqdirdə, bu proqramı yerinə yetirmək mümkün deyil”.

Deputat bildirib ki, erməni mediası bu reallığı anladığı üçün Nikol Paşinyanın ölkə daxilində əcinə ovuna çıxdığını yazır: “Məhz bu səbəbdən də Köçəriyanın həbs müddəti yenidən 2 ay müddətinə uzadılıb. Sərkisyan isə istintaqa dəvət edilib və ehtimal olunur ki, martda həbs oluna bilər. Fikrimcə, bütün bunlar Paşinyanın manevrləridir və o, Qarabağ klanının sonuna çıxmaq istəyir. Paşinyan anlayır ki, danışıqlarda güzəştlərə getmək vacibdir. Bu mənada Azərbaycan və Türkiyə ilə münasibətlərə yenidən baxmağın zamanı çatdığını zənn edir”.