Əli Həsənov: Bu prosesdə heç bir qaranlıq məqam yoxdur - FOTO

Bu gün Kütləvi İnformasiya Vasitələrinə Dəstək Fondunun on illik yubileyi qeyd olunub. Novruz bayramı ərəfəsində qeyd olunan yubileyde eyni zamanda müsabiqədə qalib gələn jurnalistlərin mükafatlandırma mərasimi də keçirilib.

Publika.az-ın məlumatına görə, dövlət rəsmilərinin, səfirlərin, millət vəkillərinin, icra başçılarının, media nümayəndələrinin və incəsənət xadimlərinin iştirakı ilə baş tutan tədbir Azərbaycan himninin səsləndirilməsindən sonra açıq elan olunub.

KİVDF-nin yubiley tədbirində qurumun on illik fəaliyyətinə həsr olunmuş videosüjet nümayiş olunub.

Fondun icraçı direktoru Vüqar Səfərli çıxışı zamanı jurnalist əməyinin stimullaşdırılması, media ilə dövlət qurumları arasında inkişaf etdirilən dialoqun yaradılması istiqamətində əldə olunan uğurlardan danışıb:

“KİVDF cənab prezident İlham Əliyevin 10 il bundan öncə 3 aprel fərmanlıyla yaradılıb. Qurum yarandığı gündən media nümayəndələri, yerli ve mərkəzi icra nümayəndəlikləri, mərkəzi orqanlar, dövlət qurumları ile birgə çoxsaylı layihələr reallaşdırıb.

Fondumuz ildə üç dəfə - Novruz bayramı, Mətbuat günü və Dünya Azərbaycanlılarının həmrəylik günündə jurnalistlər arasında müsabiqə elan edərək mükafatlandırma mərasimi keçirir.

Bu dəfəki müsabiqede 54 KİV orqanından 145 jurnalist iştirak edib və onların 109-u mükafata layiq görülüb".

Vüqar Səfərlidən sonra tədbir Prezident Administrasiyası ictimai-siyasi şöbəsinin müdiri Əli Həsənovun nitqi ilə davam etdirilib:

'Kütləvi informasiya vasitələrinə dəstək Fondu Azərbaycanda medianın inkişafında müstəsna rol oynayaraq azad media siyasətini həyata keçirir. Fondun yaradılması təşəbbüsü cənab prezident İlham Əliyev tərəfindən irəli sürülüb. 11 il öncə KİV-in inkişafına dövlət dəstəyi konsepsiyası qəbul olundu. 10 il əvvəl isə KİVDF yaradıldı. Fondun bu on illik fəaliyyətindəki ən böyük xidməti KİV-ə yardımın şəffaflaşdırılması oldu. Bu on il ərzində jurnalistlərə göstərilən bütün yardımlar fondun Müşahidə Şurasının iştirakı ilə həyata keçirilir. Əlbəttə bütün bunların reallaşmasında cənab prezidentin rolu əvəzolunmazdır. Ümumilli lider Heydər Əliyevdən sonra cənab prezident qədər jurnalistlərin qayğısına qalan ikinci bir siyasətçi yoxdur".

Nitqindən sonra Əli Həsənov ilk qalibləri özü mükafatlandırdı. Millət vəkilləri, səfirlərin, dövlət rəsmilərinin müsabiqə qaliblərini təltif etməsindən sonra KİVDF rəsmi dövlət nümayəndələrinə mükafatlarını təqdim etdi.

Qeyd edək ki, 2019-ci il fevralın 1-dən martın 15-dək davam edən müsabiqəyə ümumilikdə 54 KİV-dən 145 yazı təqdim olunub, yazılar 12 ekspert tərəfindən qiymətləndirilib, 109 jurnalistin mükafatlandırılması haqqında qərar qəbul olunub.

Müsabiqə 19 istiqamət üzrə keçirilib.