"Evə-Avropaya" "Gürcü arzusu"nu ittiham etdi

Gürcüstanda “Evə - Avropaya” hərəkatının açıqlamasına görə, əhali ilə görüşlərdə təşkilat nümayəndələrinə “Gürcü Arzusu”nun tərəfdarları və dövlət məmurları maneçilik törədiblər.

Publika.az xəbər verir ki, bu barədə təşkilatın rəsmi bəyanatında qeyd edilib.

Təşkilatın bəyanatına əsasən, Telavi, Xoni, Zuqdidi, Kutaisi, Batumi, eləcə də Tbilisidə məlumat kitabçalarının paylanması zamanı görüşlər aqressiv hakim partiya tərəfdarları və dövlət məmurları tərəfindən dağıdılmağa cəhd olunub. Hətta bəzi hallarda tərəflər arasında fiziki qarşıdurmalar baş verib. Təşkilat iqtidar partiyasını əks-məhsuldar təxribatları dayandırmağa çağırır, çünki onlar bunun ölkənin reputasiyasına ciddi zərbə vuracağını bildirirlər. Onların fikrincə, qeyd olunan hərəkətlər qanuna ziddir və buna görə də Daxili İşlər Nazirliyini görüşlər zamanı nümayəndələrinin təhlükəsizliyini təmin etməyə çağırıb.

Bəyanatda bildirilir ki, “Evə - Avropaya” hərəkatı 3 iyul tarixində genişmiqyaslı etiraz aksiyası keçirməyi planlaşdırır. Aksiyadan əvvəl isə regionlara gedərək, tədbir barədə əhaliyə məlumatlar çatdırır.

Qeyd edək ki, 24 iyunda Tbilisidə keçirilən “Evə - Avropaya” adlı aksiyada İrakli Qaribaşvilinin istefası və "Texniki hökumət"in qurulması üçün hakim partiyaya 1 həftə vaxt verilib.

Tural Turan