AYB qurultay keçirmək üçün nə qədər kredit götürüb?

Bir müddət öncə Azərbaycan Yazıçılar Birliyinin sədri Xalq yazıçısı Anar AYB-nin XIII qurultayının keçirilməsi ilə bağlı rəhbərlik etdiyi qurumun bankdan kredit götürdüyünü açıqlamışdı. Bəs həmin kreditin məbləği nə qədərdir?

Bununla bağlı AYB-dən dəqiqləşdirmə aparmağa çalışdıq.

Qurumun sözçüsü Xəyal Rza Publika.az-a açıqlamasında təyyarə biletlərinin alınması üçün kredit götürüldüyünü bildirib:

“Xalq yazıçısı Çingiz Abdullayev krediti öz nüfuzundan istifadə edərək götürmüşdü. Burada söhbət böyük məbləğdən və ya uzun müddətli kreditdən getmir. Həmin vaxt biletlər alınmalı idi, onların qiyməti isə hər keçən gün artır. Müsbət qərar verilmişdi, biz də əmin idik ki, bunun üçün AYB-yə pul ayrılacaq və krediti qaytara biləcəyik. Biletlər alınıb və biz artıq pulu qaytarmışıq”.

Kreditin məbləğinə gəlincə, AYB sözçüsü bununla bağlı məlumat verməyib:

“Bu, mühasibatlığın biləcəyi məqamlardır və AYB-nin daxili məsələsidir. Bunu ictimailəşdirməmək haqqımız var”.

Aydan Baydullayeva