"Mərkəzi Nəbatat Bağı" və "Dendrologiya Bağı" birləşdirilir

Bakı Şəhər İcra Hakimiyyəti başçısının tabeliyində olan "Mərkəzi Nəbatat Bağı" və "Dendrologiya Bağı" publik hüquqi şəxsləri "Mərkəzi Nəbatat və Dendrologiya Bağı" Məhdud Məsuliyyətli Cəmiyyətinə çevrilməklə yenidən təşkil olunub.

Publika.az xəbər verir ki, bununla bağlı Baş nazir Əli Əsədov qərar imzalayıb.

Qərara əsasən, yeni yaradılan Cəmiyyətin işçilərinin say həddi 230 ştat vahidi müəyyən edilib. Cəmiyyətin ümumi yığıncağının səlahiyyətləri isə Nazirlər Kabineti, İqtisadiyyat Nazirliyi və Bakı Şəhər İcra Hakimiyyəti arasında bölünüb.

Maliyyə və idarəetmə mexanizminə əsasən, Cəmiyyətin yenidən təşkili və ləğvi Prezidentlə razılaşdırılmaqla Nazirlər Kabinetinə, nizamnaməsinin təsdiqi, nizamnamə kapitalının miqdarının müəyyənləşdirilməsi, filial və törəmə cəmiyyətlərinin yaradılmasına razılıq verilməsi İqtisadiyyat Nazirliyinə həvalə olunub. Mülki Məcəlləyə uyğun digər cari məsələlərin həllini isə Bakı Şəhər İcra Hakimiyyəti həyata keçirəcək.

Bakı Şəhər İcra Hakimiyyəti iki ay müddətində nizamnamə və nizamnamə kapitalı ilə bağlı təklifləri İqtisadiyyat Nazirliyinə təqdim etməli, Maliyyə Nazirliyi ilə razılaşdırmaqla qurumun strukturunu, əməkhaqqı sistemini və xərclər smetasını üç ay müddətində təsdiqləməlidir. Nizamnamə təsdiqləndikdən sonra üç gün ərzində Cəmiyyətin dövlət qeydiyyatına alınması üçün müvafiq tədbirlər görüləcək.

Qərar Cəmiyyətin "Hüquqi şəxslərin dövlət qeydiyyatı və dövlət reyestri haqqında" Qanuna uyğun olaraq dövlət qeydiyyatına alındığı gündən qüvvəyə minəcək.