İcra başçısı Yasamal sakinləri ilə görüşdü - FOTOLAR

Azərbaycan Respublikasının Prezidenti cənab İlham Əliyevin vətəndaş müraciətlərinin operativ araşdırılması və həlli ilə bağlı verdiyi tapşırıqlara uyğun olaraq Yasamal rayonunda noyabr ayı üzrə növbəti səyyar qəbul keçirilib.

Publika.az xəbər verir ki, Yasamal Rayon İcra Hakimiyyətinin başçısı Elşad Həsənovun sakinlərlə görüşü 167 nömərli tam orta məktəbin akt zalında təşkil olundu. Qəbulda Yasamal RİH-in məsul əməkdaşları, rayon bələdiyyəsinin və Mənzil-Kommunal Təsərrüfatı Birliyinin rəhbər şəxsləri, inzibati ərazi dairələri üzrə nümayəndələr, həmçinin aidiyyəti dövlət qurumlarının və xidmət təşkilatlarının təmsilçiləri iştirak ediblər.Əvvəlcə tədbir iştirakçıları Ulu Öndər Heydər Əliyev və şəhidlərimizin əziz xatirəsini bir dəqiqəqlik sükutla yad etdilər.

Görüşü giriş sözü ilə açan Yasamal Rayon İcra Hakimiyyətinin başçısı Elşad Həsənov bildirib ki, vətəndaşlarla birbaşa ünsiyyətin qurulması, onların müraciət və təkliflərinin dinlənilməsi, qaldırılan məsələlərin operativ həlli dövlət başçısının müəyyən etdiyi əsas fəaliyyət istiqamətlərindəndir. O qeyd edib ki, hər bir müraciətə həssaslıqla yanaşılması, problemlərin qanunvericiliyin tələblərinə uyğun şəkildə həll edilməsi və vətəndaş məmnunluğunun təmin olunması dövlət idarəçiliyində əsas prioritetlərdəndir.

Daha sonra sakinlər onları narahat edən məsələləri, təklif və təşəbbüslərini açıq şəkildə səsləndirməyə dəvət olundular.Qəbul zamanı mülkiyyət mübahisələri, mənzil-məişət şəraitinin yaxşılaşdırılması, dövlət ehtiyacları üçün torpaqların alqı-satqısı, qurumuş və ətrafa təhlükə yaradan ağacların budanması, mərasim evlərinin fəaliyyəti, sahibsiz itlərlə mübarizə, rayon ərazisində idman infrastrukturunun təkmilləşdirilməsi, avtoparkinq problemi və sosial sahəyə aid müxtəlif problemlərlə bağlı müraciətlər səsləndirilib.

İki saatlıq qəbul zamanı səsləndirilən bütün müraciətlər diqqətlə dinlənilib, bir sıra məsələlər yerində araşdırılaraq operativ həll olunub, əlavə araşdırma tələb edən müraciətlər isə nəzarətə götürülərək aidiyyəti qurumlara icrası üçün yönləndirilib. Problemlərin qısa müddətdə həlli məqsədilə müvafiq qurumların rəhbərlərinə konkret tapşırıqlar verilib.

Sonda Elşad Həsənov bir daha vurğulayıb ki, vətəndaşların müraciətlərinə operativ və obyektiv baxılması, onların hüquq və mənafelərinin qorunması Yasamal Rayon İcra Hakimiyyətinin fəaliyyətində daim diqqət mərkəzində saxlanılır. Bildirilib ki, nəzarətə götürülmüş bütün müraciətlərin həlli istiqamətində aidiyyəti qurumlar tərəfindən zəruri tədbirlər görüləcək və icra prosesi mütəmadi olaraq izləniləcək.Görüşdə 8 noyab Zəfər Gününün tariximizdəki böyük əhəmiyyətindən də söhbət açıldı.

Səyyar qəbul zamanı həmçinin Yasamal rayon sakinlərinə ölkədə rəqəmsəl inkişaf tədbirləri, ələlxüsus Mygov.az platformasının üstünlükləri barədə maarifləndirici məlumatlar da verildi.