Nida Xəbər

Qarsda Zəfər Gününə həsr olunan möhtəşəm yürüş - Foto

9 Noyabr 2026 20:04

Azərbaycanın Zəfər Gününün 6-cı ildönümü Türkiyənin Qars şəhərində təntənəli yürüşlə qeyd edilib. Tədbir zamanı “Qarabağ Azərbaycandır” şüarları səsləndirilib, “İki dövlət, bir millət” qardaşlığı vurğulanıb.

Publika.az xəbər verir ki, yürüş Qars Valiliyi və Bələdiyyəsinin, Azərbaycanın Diasporla İş üzrə Dövlət Komitəsinin, Azərbaycanın Qarsdakı Baş Konsulluğunun və Azərbaycan-Türkiyə Dərnəkləri Birliyinin təşkilatçılığı ilə keçirilib.

Qars valisi Ziya Polat, şəhər bələdiyyəsinin sədri Ötüken Senger, Azərbaycanın Qarsdakı baş konsulunun müavini Erdal Məmmədoğlu və digər rəsmi şəxslərin də qatıldığı yürüş Qars Valiliyinin qarşısından başlayıb.

Əllərində Türkiyə və Azərbaycan bayraqları tutan iştirakçılar Karadağ və Atatürk prospektləri boyunca hərəkət edərək Qarsın tarixi qapalı bazarının qarşısına toplaşıblar. Burada Qafqaz xalq rəqsləri kollektivlərinin çıxışları və atəşfəşanlıq nümayiş etdirilib.

Yürüşün sonunda jurnalistlərə açıqlama verən Qars Bələdiyyəsinin sədri Ötüken Senger Qarabağın 44 günlük Vətən müharibəsindən sonra əbədi olaraq türk yurdu olduğunu bildirib. O, müharibədə şəhid olanları rəhmət və ehtiramla yad edib, Azərbaycanın Zəfər Gününü təbrik edib.

Qars valisi Ziya Polat da Azərbaycan və Türkiyənin “İki dövlət, bir millət” anlayışı ilə bundan sonra da çiyin-çiyinə irəliləyəcəyini vurğulayıb. O, şəhidlərə rəhmət, qazilərə sağlam və uzun ömür arzulayaraq Azərbaycanın Zəfər Gününü təbrik edib.