Son bir həftədə avronun dollara nisbətən məzənnəsində düşmə müşahidə edilir. Nəzərə alsaq ki, Azərbaycanda ikivalyutalı səbətdən istifadə edilir, avro manat qarşısında da zəifləyib.
Valyuta bazarındakı dəyişiklikləri Publika.az-a şərh edən iqtisadçı-ekspert Vüqar Bayramov deyir ki, qarşıdakı dövrdə bir avro 1 dollar 10 sent ətrafında dəyişəcək. Hələlik avronun məzənnəsində ciddi artım proqnozlaşdırılmır”.
Avronun məzənnəsinin artımı üçün zəmin olmadığını deyən iqtisadçı bildirdi ki, avronun dollara nisbətən məzənnəsində koridor var. Avro həmin koridor daxilində dəyişir: “Söhbət 1 avro-1 dollar 7 sent və ya 1 dollar 17 sent arasındakı koridordan gedir. Son dövrlər avronun məzənnəsi həmin koridorda dəyişib”.
İqtisadçı yığım aparan Azərbaycan vətəndaşlarına tövsiyələrini də bildirdi. Onun fikrincə, bu zaman üçvalyutalı səbətdən istifadə etmək daha doğrudur: “Yığımların 60 faizi dollar, 20 faizi manat, 20 faizi avro ilə aparılmalıdır. Bu asılılıq valyuta bazarında baş verən risklərdən qorunmaq üçün vacibdir. Qlobal valyuta bazarında baş verənlər onu göstərir ki, ən doğru yol yığımların səbət formasında aparılmasıdır”.
V.Bayramov deyir ki, noyabr ayının əvvəlində Avrozonada açıqlanacaq iqtisadi yekunlar avronun məzənnəsi ilə bağlı proqnoz verməyə imkan yaradacaq.
İqtisadiyyat şöbəsi
