Digər
“Lavrovun burda bir söz, İrəvanda başqa söz deməsi Rusiya siyasətinin mahiyyətidir“
Rusiya xarici işlər naziri Sergey Lavrovun Ermənistan və Azərbaycana baş tutan son səfəri bir sıra məqamları ilə həm yerli, həm də xarici mətbuatın diqqətini çəkib.
Rusiya XİN başçısının Qarabağ münaqişəsinin həlli ilə bağlı
açıqlamarındakı bəzi məqamları politoloq Zəfər Quliyev Publika.Az-a
şərh edib:
- Zəfər bəy, Rusiyanın xarici işlər naziri Serqey Lavrov bu gün
Bakıda Moskva Dövlət Universitetinin filialının tələbələri
qarşısında çıxışı zamanı deyib ki, münaqişə tərəfinin arzusu ilə
həmsədrlərdən hansınınsa əvəzlənməsi mümkündür. Bu açıqlamanı necə
şərh edə bilərsiniz?
- Ümumiyyətlə, hansısa həmsədrin, xüsusilə də Fransanın əvəzlənməsi
məsələsi periodik olaraq gündəmə gəlir. Həm Azərbaycan ictimaiyyəti
bu məsələyə dəfələrlə toxunub, həm də xarici mətbuatda bu məsələ
qaldırılır. Əslində mən hesab edirəm ki, formatı dəyişdirmək
məsələsi elə də real deyil. Bu məsələ reallaşsa belə, Fransanın
Avropa İttifaqı ilə əvəzlənməsinin ATƏT-in Minsk Qrupunun
vasitəçiliyi ilə gedən danışıqlar prosesinə birbaşa təsir edə
biləcəyinə inanmıram.
Hər halda Azərbaycan bu dəyişikliyi istədiyi formada həyata keçirə
bilməz. Əgər tərəfimizdən belə bir məsələ müzakirəyə çıxarılsa,
digər həmsədrlərin və Ermənistanın da rəyi nəzərə alınacaq.
Ermənistan isə Fransanın əvəzlənməsində və formatın
dəyişdirilməsində maraqlı deyil. Eyni zamanda Avropa İttifaqı da
belə bir maraqda deyil. Çünki Fransa Minsk Qrupunda Avropa
İttifaqının maraqlarını ifadə edir.
Azərbaycanın belə bir məsələ qaldırmaq imkanı da sadəcə formal
xarakter daşıyır. Görünür ki, həmsədrlər, o cümlədən ABŞ və Rusiya
hər hansı dəyişikliyə maraqlı deyillər. Bu danışıqlar prosesinin
nəticəsinin olmasında bu iki dövlət rol oynaya bilər, onlar da
münaqişənin həll olunmasında ciddi mövqe qoymurlar.
- Bəs Türkiyənin həmsədr olaraq ATƏT-in Minsk Qrupuna qatılması
məsələsi nə qədər realdır?
- Türkiyənin həmsədr olmaq məsələsi də bir neçə dəfə gündəmə
gətirilib, amma Ermənistan buna sərt şəkildə etiraz edir. Eyni
zamanda ABŞ və Rusiyanın da mövqeyi burada önəm daşıyır. Türkiyənin
regionun problemlərinə yaxın və eyni zamanda önəmli dövləti kimi
ATƏT-in Minsk Qrupunda təmsil olunması müsbət hal ola bilərdi.
Türkiyə Minsk qrupunun üzvü olsa da, həmsədr seçilməsinə
Ermənistanla yanaşı, Rusiyanın da etiraz edəcəyini gözləyirəm.
Rusiya vəziyyətə nəzarəti əldən buraxmaq istəmir.
- Lavrov İrəvanda da demişdi ki, ATƏT-in Minsk Qrupunun
formatında heç bir dəyişikliyə ehtiyac görmür. Eyni adamın
açıqlamaları arasındakı ziddiyət nə ilə izah oluna bilər?
- Moskva nümayəndəsinin İrəvanda bir söz deməyi, Bakıda bir söz
deməyi yeni hal deyil. Hələ Sovet dövründən başlayaraq, Kreml
Ermənistana və Azərbaycana iki ayrı nüfuzlu adam göndərir və iki
ölkənin ictimaiyyətlərinə xoş olan açıqlamalarla arxayın etməyə
çalışırdı. İndi isə artıq iki nümayəndəyə ehtiyac qalmayıb.
Lavrovun burda bir söz, orda başqa söz deməsi Rusiya siyasətinin
mahiyyətindən irəli gəlir. Rusiyaya münaqişənin həll olunması
maraqlı deyil. Əksinə danışıqların vaxtaşırı dondurulması və ya
qismən fəallaşması ilə aparılmasında, daha doğrusu yubadılmasında
maraqlıdır. Rusiya həm İrəvana, həm də Bakıya təzyiq edir, öz
həlledici rolunu itirmək istəmir.
- Hansısa dəyişiklik olarsa, bu necə olmalıdır?
- Keçən il keçirilən Kazan görüşündən bəri danışıqlar dondurulub,
yeni yanaşma və təkliflər mövcud deyil. Hansısa istək də müşahidə
olunmur. Digər tərəfdən bu il və 2012-ci ilin həmsədr ölkələrdə
seçki ili olması danışqıların uzadılmasına təsir edir. Hər iki
ildən bir bu seçki məsələsi gündəmə gəlir, nəticədə danışıqlar
uzadılır.
Beynəlxalq güclər Ermənistanın işğalına son qoymaq istəmədikləri
halda, Azərbaycanı təzyiqlər göstərərək müharibə ritorikasından
uzaq olmağa çağırırlar. Həmsədrlər müharibə variantına razı
olmayacaqlarını desələr də, sülh danışıqları havada qalıb. Belə
görünür ki, münaqişə ancaq müharibə yolu ilə həll oluna bilər.
Dəyişiklik isə sadəcə o şəkildə ola bilər ki, həmsədrlər məsələyə
ciddi yanaşsınlar. Azərbaycan yeniləşmiş Madrid prinsipləri ilə
razılaşıb, hətta Ermənistan qoşunlarının mərhələli şəkildə
Qarabağdan çıxmasına da razıdır. Azərbaycan de-fakto məğlub ölkədir
və ondan qalib tərəfə - Ermənistana güzəştlər gözləyirlər.
Ermənistan tərəf razılaşmayanda isə, ona təzyiq göstərən yoxdur.
Görünür ki, həmsədrlər Azərbaycanın əl-qolunu bağlayırlar. Son
təkliflər biz tərəfdən qəbul olunsa da, Ermənistan işğalın
uzadılmasına davam edir. Biz isə ziyandayıq. Torpaqlarımızın
işğalda daha çox qalması bizim maraqlarımıza cavab vermir.
Rüfət Əhmədzadə
Publika.Az
-
Magazin106:16
Əməkdar artist: “Oğlumun vəfatından sonra yatmıram”
-
Kriminal03:30
Sumqayıtda DƏHŞƏT: oğul ata-anasını qətlə yetirdi - YENİLƏNDİ
-
Magazin202:22
Məşhur model çimərlikdə çılpaq pozalar verdi - FOTO
-
Nəqliyyat01:00
ŞOK İDDİA: Dubayda su altında qalan avtomobillər Azərbaycana gətirilə bilər - VİDEO
-
Magazin100:45
“Səhvlərinizin əllərindən öpün”
-
MDB00:30
Azərbaycanlı milyarder Rusiyanın ən zəngin adamı oldu
-
Qoroskop00:15
Günün ULDUZ FALI: münasibətlər gərginləşə bilər
-
MDB18 Aprel 23:12
Bu ölkədə falçı və cadugərlərlə bağlı SƏRT QƏRAR VERİLƏCƏK