Savaşın 39-cu günü: Düşmən geri çəkildi, yeni ərazilər İŞĞALDAN AZAD EDİLDİ

Publika.az Ermənistan silahlı qüvvələrinin təxribatından sonra Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə uzun illər işğalda olan torpaqlarımızın azad olunması uğrunda başladılan əks-hücum əməliyyatları ilə bağlı “Müharibənin bu günü” xronikasını təqdim edir:

4 noyabr 2020-ci il. Müharibənin 39-cu günü.

Saat - 07:41 - Düşmən Tərtər və Ağdam istiqamətində darmadağın edildi, geri çəkildi

2020-ci ilin noyabrın 3-ü gün ərzində və 4-ə keçən gecə Ermənistan silahlı qüvvələrinin bölmələri cəbhənin müxtəlif istiqamətlərində Azərbaycan Ordusu bölmələrinin yerləşdiyi mövqeləri və yaşayış məntəqələrimizi müxtəlif atıcı silahlar, top və minaatanlardan atəşə tutdu. Döyüş əməliyyatları müxtəlif intensivliklə əsasən cəbhənin Tərtər, Ağdam, Xocavənd, Zəngilan və Qubadlı istiqamətlərində davam etdi. Düşmən cəbhənin bəzi sahələrində şəxsi heyət və hərbi texnikada itkilər verərək geri çəkilməyə məcbur edildi. Sutka ərzində düşmənin xeyli sayda canlı qüvvəsi, 2 ədəd T-72 tankı, 3 ədəd D-30 topu, “Zastava M-55” zenit qurğusu, 1 ədəd taktiki PUA-sı, 3 ədəd hərbi yük maşını məhv edildi.

Saat - 09:13 - Düşmən Tərtər və Ağcabədini atəşə tutdu

Saat - 10:05 - İlham Əliyev İtaliyanın “La Republica” qəzetinə müsahibə verdi

Saat - 10:45 - Ermənistan silahlı qüvvələrinin bölmələri Ağdam rayonunun kəndlərini intensiv artilleriya atəşinə tutdu

Saat - 15:25 - Ordumuz Ağdərədə daşı daş üstündə qoymadı - Düşmənə SARSIDICI ZƏRBƏ

Ötən ilin bu günü cəbhənin Ağdərə istiqamətində döyüşlərdə iştirak edən Ermənistan silahlı qüvvələrinin 5-ci dağatıcı alayının bölmələrinə vurulan atəş zərbəsi ilə xeyli sayda şəxsi heyət məhv edilib və döyüş texnikası sıradan çıxarıldı. UAZ markalı hərbi avtomobilin sıradan çıxarılması nəticəsində məhv edilən şəxsi heyətlə arasında hərbi hissənin zabiti kapitan Ando Qrikoryan da var idi.

Saat - 16:06 - Düşmən Tərtəri atəşə tutdu

Saat - 17:52 - Yeni ərazilər İŞĞALDAN AZAD EDİLDİ

Müzəffər Azərbaycan Ordusu Cəbrayıl rayonunun Mirək, Kavdar, Zəngilan rayonunun Məşədiismayıllı, Şəfibəyli, Qubadlı rayonunun Başarat, Qarakişilər, Qaracallı kəndlərini işğaldan azad etmişdir. Eşq olsun Azərbaycan Ordusuna! Qarabağ Azərbaycandır! 2020-ci ilin bu günü bunu Prezident İlham Əliyev özünün rəsmi tvitter hesabında qeyd etdi.

Saat - 21:12 - Zəngilan istiqamətində düşmənin diversiya cəhdinin qarşısı alındı

2020-cı ilin noyabrın 4-də Ermənistan-Azərbaycan dövlət sərhədinin Zəngilan rayonu sahəsində bölmələrimizə qarşı düşmənin diversiya cəhdinin qarşısı qətiyyətlə alındı. Ciddi döyüş itkiləri verən düşmənin kəşfiyyat-diversiya qrupu geri çəkilməyə məcbur edildi.