Təcili Yardımdan istilərlə bağlı XƏBƏRDARLIQ

Bakı Şəhər Təcili Tibbi Yardım Stansiyası avqust ayında gözlənilən kəskin istilərlə bağlı əhaliyə xəbərdarlıq edib.

Stansiyadan Publika.az-a verilən məlumata görə, hava şəraiti ilə əlaqədar insanlara ehtiyatlı olmaq, günün isti saatlarında açıq havada gəzməmək, günəşdən qorunmaq məsləhət görülür:

“Saat 12-17 arası əhaliyə evdən bayıra çıxmamaq tövsiyə olunur. Həssas insanlar, xroniki xəstəliyi olanlar, yüksək qan təzyiqindən əziyyət çəkənlər, yaşlı insanlar, körpə uşaqlar həmin müddətdə açıq havada olmamalıdırlar. Əgər bayıra çıxmaq məcburiyyətindədirlərsə, onda qoruyucu eynəkdən, çətirdən, gündən qoruyan papaqdan istifadə etsinlər. Ümumiyyətlə, isti günlərdə insanlara çoxlu soyuq maye qəbul etmək tövsiyə olunur”.

Belə isti hava şəraitində insanların fiziki işdən uzaq olması, yanlarında həmişə ehtiyat su saxlaması lazımdır.

Stansiyadan onu da bildirdilər ki, ötən həftə ərzində 15 nəfər günvurma ilə Tibbi Yardım Stansiyasına müraciət edib. Onlardan 5 nəfəri xəstəxanaya yerləşdirilib və 10 nəfərinə isə yerində yardım göstərilib.

Gülnar Əliyeva