Əli Abbasov Çilidə prezidentlə görüşüb

Rabitə və yüksək texnologiyalar naziri Əli Abbasov martın 10-11-də Çilidə səfərdə olub.

Publika.Az-ın məlumatına görə, nazir Çili Respublikasında prezident mandatının cənab Sebastian Pinera Eçenikedən yeni seçilmiş prezident xanım Mişel Baçeletə keçməsi mərasimində Azərbaycan Respublikası hökuməti adından iştirak etmək məqsədilə bu ölkəyə səfər edib.

Səfərin birinci günü nazir Əli Abbasov mandatını başa vurmaqda olan prezident cənab Sebastian Pinera və onun hökumətindəki xarici işlər naziri cənab Alfredo Morenonun adından təşkil olunmuş rəsmi tədbir və qəbullarda iştirak edib.

11 mart tarixində isə yeni prezident Mişel Baçelet və onun hökumət üzvlərinin andiçmə mərasimində iştirak edən nazir Çilinin dövlət başçısına prezident İlham Əliyevin ən xoş arzularını və səmimi təbriklərini çatdırıb. Səfər çərçivəsində son olaraq nazir Çilinin yeni daxili işlər naziri cənab Rodriqo Penailillonun adından xarici nümayəndə heyətləri başçılarının şərəfinə təşkil olunmuş rəsmi qəbulda da iştirak edib.

Publika.Az