Azərbaycanda mobil telefon fırıldaqçıları “peyda” olub

Şəbəkə şəklində fəaliyyət göstərən fırıldaqçılar Azərbaycanın mobil operatorlarının abunəçilərini tora salıblar.

Beynəlxalq mobil dələduzlar Azercell abunəçilərinə rus dilində “Zdravstvuyte, pozvonite mne sroçno” SMS-i göndərir, geriyə zəng etmək üçün də telefon nömrəsi qoyurlar. Belə SMS-lərdən biri Azercell abunəçisinə +4673170184 nömrəsindən gəlib və ona 006745599387 nömrəsinə təcili zəng etməsi bildirilib.

Bu cür faktlar xeyli sayda qeydə alındığından, Azercell şirkəti öz Facebook səhifəsində abunəçilərinə xəbərdarlıq ünvanlayıb: “Hörmətli abunəçilər, son günlər Azercell şəbəkəsi istiqamətində beynəlxalq mobil dələduzlarının fəallaşmasını nəzərə alaraq, sizə diqqətli olmağı tövsiyə edirik. Bununla əlaqədar tərəfimizdən bütün müvafiq tədbirlər görülür.

Şübhəli məzmunlu SMS-lərə geri dönüş etməməyi, həmin SMS-də göstərilən beynəlxalq nömrələrə zəng etməməyi məsləhət görürük. Əks halda, nömrə hesabınızda böyük məbləğdə borc yarana bilər”.

Abunəçilər şirkətin həyata keçirdiyi yeni kampaniya, tarif planları və digər məhsullar barədə Azercell-in rəsmi saytı, Facebook səhifəsi və mətbuat kanallarından daha ətraflı məlumat ala bilərlər. Bayram günlərində dələduzların toruna düşmək istəmirsinizsə, ayıq-sayıq olun.