• USD 1,7000 0,00% EUR 2,0179 -0,08%
    • GBP 2,3668 +0,16% RUB 0,0233 0,00%

Ermənistanın müharibə cinayətləri ilə bağlı müraciət olundu

Ermənistanın müharibə cinayətləri ilə bağlı müraciət olundu

200-dən artıq ölkə QHT-si Azərbaycan Respublikasının işğal edilmiş Dağlıq Qarabağ regionunda Ermənistan tərəfindən törədilmiş müharibə cinayətləri ilə bağlı beynəlxalq ictimaiyyətə müraciət ünvanlayıb.

QHT-lər beynəlxalq ictimaiyyəti törətdiyi müharibə və insanlıq əleyhinə cinayətlərə görə Ermənistana qarşı sanksiyalar tətbiq etməyə çağırıb. Beynəlxalq ictimaiyyətə ünvanlanan müaricətin mətnini təqdim edirik:

"2016-cı il 2 aprel tarixində Ermənistan Respublikası Silahlı Qüvvələrini təxribatı nəticəsində Azərbaycan Respublikasının işğal olunmuş Dağlıq Qarabağ regionunda vəziyyət yenidən gərginləşmişdir. Ermənistan Respublikasının Silahlı Qüvvələri ilə təmas xəttində yerləşən Azərbaycan kəndləri qarşı tərəfin artilleriya və digər ağır döyüş silahlarından aramsız atəşə tutulmuş və nəticədə 16 yaşlı yeniyetmə də daxil olmaqla 4 mülki şəxs həlak olmuş, 18 mülki şəxs, o cümlədən 13 və 16 yaşlarında iki yeniyetmə yaralanmış, 164 şəxsin əmlakına ziyan vurulmuşdur.

Azərbaycan Respublikasının Silahlı Qüvvələri mülki şəxslərin təhlükəsizliyinin təmini və müdafiəsi məqsədilə cavab atəşi açmağa məcbur olmuşdur. Aprelin 3-də Azərbaycan birtərəfli qaydada atəşi dayandırmaq barədə bəyanat versə də, qarşı tərəf atışmaları dayandırmamış və nəticədə cəbhə xəttində döyüşlər aprelin 5-dək davam etmiş, mülki şəxslər və hərbi heyət arasında itkilər artmışdır.

Nəzərinizə xüsusilə çatdırmaq istərdik ki, Ermənistan Respublikası Müdafiə Nazirliyinin təqdim etdiyi döyüşlərdə həlak olmuş əsgər və zabitlərinin siyahısı göstərir ki, onların böyük əksəriyyəti Ermənistan vətəndaşı və Ermənistan silahlı qüvvələrinin hərbiçiləri olmuşlar. Bu isə, Ermənistanın BMT Baş Assambleyasının 1974-cü il tarixli “Təcavüzün anlayışı haqqında” 3314 saylı qətnaməsinə əsasən Azərbaycana qarşı təcavüz etdiyini bir daha sübut edir.

Qeyd etmək vacibdir ki, Ermənistan tərəfi nizami ordu ilə yanaşı, hərbi əməliyyatlara 1990-cı illərdə oldugu kimi könüllülər adı altında terror şəbəkəsini də cəlb etmişdir. Belə ki,məlumatlara əsasən 2016-cı il aprel ayında Azərbaycan Dağlıq Qarabağ regionunda erməni könüllüləri adı altında Suriyada vuruşmuş PKK, PYD teror təşkilatlarının üzvü olan 400-ə yaxın erməni, o cümlədən ASALA erməni teror təşkilatının liderlərindən biri, 1981-ci ildə Parisdə törədilən terror aktlarının müəlliflərindən olan Vazgen Sislyan da vuruşmuşdur.

Diqqətinizə xüsusilə çatdırmaq istərdik ki, döyüşlər gedişində Ermənistan Silahlı Qüvvələrinin əlinə keçmiş və sonradan Azərbaycana təhvil verilmiş Azərbaycan Silahlı Qüvvələrinin zabit və əsgərlərinin cəsədləri üzərində işgəncə, insan ləyaqətini alçaldan rəftar və təhqir əlamətləri aşkar edilmişdir. Bununla, Ermənistan Respublikası “Müharibə qurbanlarının müdafiəsi haqqında” 1949-cu il tarixli Cenevrə Konvensiyalarının müddəalarını kobudcasına pozmuş, ümumbəşəri dəyərləri bir daha riyakarcasına tapdalamışdır.

Sizin humanizm və insanpərvərlik hisslərinizə müraciət edərək, Ermənistan tərəfinin 1988-ci ildən etibarən bu günədək davam etdirdiyi təcavüzkar siyasətini pisləməyə, törətdiyi müharibə və insanlıq əleyhinə cinayətlərə görə Ermənistana qarşı sanksiyaların tədbiq edilməsinə çağırırıq".

Halal Nemət

Xəbər lenti

DAHA ÇOX XƏBƏR