Azərbaycanda asfaltın keyfiyyəti ölçüləcək - FOTOLAR

Standartlaşdırma, Metrologiya və Patent üzrə Dövlət Komitəsi asfaltın keyfiyyətini müəyyən etmək üçün səyyar sınaq laboratoriyanı istifadəyə verib. Ölkəmizdə ilk belə bir laboratoriyanın qurulmasında məqsəd asfalt-beton qarışığı məhsullarının keyfiyyətinə nəzarətlə bağlı işləri sürətləndirməkdir.

Bu barədə Publika.az-a Standartlaşdırma, Metrologiya və Patent üzrə Dövlət Komitəsinin mətbuat xidmətindən məlumat verilib.

“Respublikada çəkilmiş və çəkilməkdə olan asfalt yollarının keyfiyyət göstəricilərini operativ və yerində müəyyən etmək üçün Komitənin Təcrübə-Sınaq Mərkəzi (AzTEST) tərəfindən asfaltın sınağı üzrə səyyar laboratoriya alınıb istifadəyə verilib. Laboratoriyada qurulmuş ən müasir texnoloji avadanlıqlar vasitəsilə həm çəkilmiş, həm də çəkilməkdə olan yollarda asfalt-betonun keyfiyyətini bütün göstəricilər üzrə müəyyən etmək, həmçinin yolun alt qatının – özülünün keyfiyyətini yoxlamaq mümkündür. Səyyar laboratoriyada asfalt-beton qarışığının və bu qarışıqda istifadə olunan materialların – bitum, qırma daş, çınqıl və mineral tozun da keyfiyyəti müəyyən olunacaq.

Laboratoriyada çalışan işçilər xarici ölkələrdə ixtisasartırma kursu keçərək, sınaq metodlarına dərindən yiyələniblər. Laboratoriya artıq ilk sınaqlarına başlayıb”.