İşləmək üçün növbəyə durmuşdum, çağırmadılar – Ağalı sakini

“Ağalıda evlərin nömrələri sakinlərə təqdim olunub. Amma hələ ki, açarları verməyiblər. Yaxın vaxtlarda köçəcəyimizi, ancaq bunun nə vaxt baş verəcəyini deməyiblər. Ağalıda işləmək üçün qeydiyyata, növbəyə durmuşdum, amma çağırmadılar. İstəyirdim ki, gedib öz kəndimizin yenidən qurulmasında iştirak edim”.

Bunu Publika.az-a açıqlamasında Zəngilan rayonunun Ağalı kənd sakini Telman Mirzəyev deyib.

Ağalı kəndinə qayıdacaq 41 ailə başçısından biri olan Telman Mirzəyev söyləyib ki, ixtisasca inşaatçıdır və yenidənqurma işlərinə böyük töhfələr verə bilər:

“İnşaatı qurtarmışam. Hal-hazırda ustalıq edirəm. Ağalı kəndində bizə 21-ci mənzil verildi. 3 otaqlı mənzildir. 4 nəfərlik ailəmiz var. Noyabr ayında bizi Ağalı kəndinə aparmışdılar. Evlərimizi bizə göstərirdilər. O vaxt bizə dedilər ki, qayıdandan sonra hamı orada işlə təmin olunacaq. Amma bu dəfə köçürülən şəxslərin, onların ailə üzvlərinin işlə təmin olunub-olunmayacağı ilə bağlı heç nə demədilər. 30 ildən sonra Ağalıya qayıtmaq böyük xoşbəxtlikdir. Çox sevinirik ki, doğma elimizə, obamıza qayıdırıq”.