Qırmızı.az
“Abbas, bizi güllələmə!“- AİLƏLƏR VƏ TALELƏR
Həyat yoldaşını, oğlunu və qardaşını güllələyən keçmiş idmançı ömrünün 15 ilini həbsxana divarları arxasında keçirəcək.
Bakı Ağır Cinayətlər Məhkəməsində qəsdən adam öldürməkdə ittiham
edilən Masallı rayon Gənclər və İdman İdarəsinin əməkdaşı Abbas
Abbasovun məhkəmə istintaqı başa çatıb.
İki il öncə Masallı rayonunun Şərəfə kəndində ailə münaqişəsi
zəminində silahlı insident baş vermişdi. Rayon Gənclər və İdman
idarəsinin əməkdaşı, idman məktəbinin direktoru 1957-ci il
təvəllüdlü Abbas Abbasov həyat yoldaşı - 1961-ci il təvəllüdlü
Zahidə Ağayevanı, oğlu - 1989-cu il təvəllüdlü Xəzər Abbasovu və
qardaşı - 1955-ci il təvəllüdlü Hüseyn Abbasovu odlu silahdan atəş
açaraq yaralamışdı.
Hər üç şəxs Masallı regional təcili tibbi yardım stansiyasında
Zahidə Ağayeva və Hüseyn Abbasovun üzərində cərrahiyyə əməliyyatı
aparılmışdı. Həkimlərin səylərinə baxmayaraq, Ağayeva aldığı
xəsarətlərdən elə xəstəxanadaca dünyasını dəyişmişdi.
İstintaq materiallarına görə hadisə belə baş
verib
Abbas Abbasov 17 mart 2010-cu ildə saat 22 radələrində sərxoş
vəziyyətdə yaşadığı evdə oğlu Xəzər və keçmiş arvadı Zahidə ilə
mübahisə edir. Zahidənin söyüş və təhqirlərindən qəzəblənən Abbas
qisas almaq məqsədi ilə evdən götürdüyü tüfənglə əvvəlcə onunla bir
həyətdə yaşayan, mübahisə səsinə onlara gələn, qardaşı Hüseynə atəş
açıb ağır xəsarətlər yetirir.
Daha sonra keçmiş həyat yoldaşı Zahidəyə iki dəfə atəş açmaqla onu
ölümcül yaralayır. Sonda isə tüfəngi oğluna tuşlayır...
Zahidə Ağayeva aldığı bədən xəsarətlərindən Masallı rayon mərkəzi
xəstəxanasında ölür, Xəzər və Hüseyn Abbasovlar isə göstərilmiş
tibbi yardım nəticəsində sağ qalırlar.
"Arvadım məni saymırdı"
Məhkəmədə Abbas Abbasov ona elan olunmuş ittihamla özünü təqsirli
bilib. İfadəsində hadisəyə qədər Masallı rayon Gənclər və İdman
İdarəsi nəzdindəki idman məktəbinin direktoru vəzifəsində
işlədiyini göstərib: "Zahidə ilə 1986-cı ildə ailə həyatı qurmuşam.
1998-ci ildən arvadım məni bəyənmədiyinə və ər kimi qəbul
etmədiyinə görə münasibətlərim pozulmuşdu. Həmin vaxtdan ayrı
yaşamışıq. 24 sentyabr 2009-cu ildə Zahidə rəsmən məndən boşandı.
Məhkəmə Zahidəyə mənim yaşadığım evdə yaşamaq hüququ verildi. Mən
ikinci mərtəbədə, oğlumla arvadım isə birinci mərtəbədə
yaşayırdılar. Ailədə həmişə arvadım mənə təhqirlə yanaşıb, heç vaxt
evin kişisi kimi məni saymayıb, şəxsiyyətimi alçaldıb.
17 mart 2010-cu ildə işdən çıxan vaxt köhnə şagirdlərimlə
rastlaşdım. Onlarla yeməkxanaya gedib yeyib-içdik. Axşam evə
qayıdanda Xəzəri çağırıb ona repititor pulunu vermək istədim.
Xəzərin son dörd ayda müəllim yanına az-az getdiyini, vaxtını hədər
yerə sərf etdiyini deyib ona irad elədim. Xəzərə irad tutduğuma
görə Zahidə məni təhqir edib anamı, bacımı pozğun adlandırdı. Oğlum
isə yaxamdan yapışıb sifətimə yumruq vurdu".
"Yataq otağındakı ov tüfəngini götürüb aşağı
düşdüm"
Abbasın sözlərinə görə, o, şok vəziyyətdə evin ikinci mərtəbəsinə
qalxıb, yataq otağındakı ov tüfəngini və 11 patronu götürüb birinci
mərtəbəyə düşüb: "Mən aşağı düşəndə Zahidə ilə Xəzəri birinci
mərtəbədə görmədim. Oğlumun və keçmiş arvadımın söyüş səslərinə
çölə çıxdım. Səsin istiqamətindən bildim ki, qardaşım Hüseyngilə
gedirlər. İki dəfə həyətimizdə olan su quyusuna doğru, Zahidənin
səsi gələn tərəfə, iki dəfə isə Hüseyninin evinə sarı, Xəzərin səsi
gəldiyinə görə atəş açdım. Sonra Hüseyn söyə-söyə üstümə gəldi.
Hüseynə də iki dəfə atəş açdım.
Hüseyn gəlib mənimlə əlbəyaxa oldu. Tüfəngi almaq istədikdə onu
itələdim, qaçıb evə girdi. Evdən Xəzərin, Hüseynin arvadı Sayatın
səsləri gəlirdi. Qapını itələsəm də, bağlı olduğunu görüb geri
qayıtdım. İkinci mərtəbəyə qalxıb atdığım patronların bir neçə boş
gilizini yataq otağındakı sellofan torbaya qoydum. Əvvəlcə tüfəngi
evə qoymaq istədim. Sonra fikirləşdim ki, Zahidə ilə oğlum məndən
şikayət edəcək, ona görə tüfəngi qonşum Vüsal İbayevə verdim.
Tüfəngi məndən başqa heç kimə verməməyini tapşırdım. Evə qayıtdım.
Təxminən 15-20 dəqiqə sonra Masallı rayon Polis Şöbəsinin
əməkdaşları gəlib məni apardılar".
"Gəlib sizin leşinizi çölə tökəcəm"
Təqsirləndirilən şəxs ifadəsində içki düşkünü olmadığını, yalnız
toyda-bayramda spirtli içki qəbul etdiyini göstərib: "Spirtli içki
düşkünü deyiləm. 10 il Masallı rayon Gənclər və İdman idarəsinin
nəzdindəki idman məktəbinin direktoru olmuşam. 15 il sərbəst güləş
və əlbəyaxa döyüş idman növü üzrə məşqçi müəllim işləmişəm. Sərbəst
güləş üzrə SSRİ idman ustası olmuşam. Tüfəngi Xəzəri və Zahidəni
qorxutmaq üçün götürmüşdüm. Mən yuxarı qalxanda onlara "gəlib sizin
leşinizi çölə tökəcəm" demişdim. Buna görə də Xəzərlə Zahidə tüfəng
götürməyə getdiyimi bilib evdən çölə qaçmışdılar".
"Uzun illər arvadımın hərəkətlərinə dözmüşdüm"
Abbas Abbasov deyib ki, tüfəngdən 6-7 dəfə atəş açıb: "Zahidəni,
Xəzəri və Hüseyni evin həyətində vurmuşam. Zahidənin və oğlumun
məni təhqir etməsi əsəblərimi tarıma çəkmişdi. Oğlanlarıma görə
uzun müddət Zahidənin hərəkətlərinə dözmüşəm. Artıq bütün səbrim
tükəndiyindən bu hadisəni törətdim. Mən tam sağlamam, peşəkar
idmançıyam, heç bir psixi və ya digər xəstəlikdən əziyyət
çəkmirəm..."
"Qardaşım arvadı əxlaqlı qadın idi"
Hüseyn Abbasov istintaqa ifadəsində qardaşının spirtli içkilərə
meylli insan olduğunu göstərib: "Zahidə həm qohum kimi atamın
dayısı nəvəsidir, həm də qardaşım Abbasın keçmiş arvadıdır. Abbas
1986-cı ildə Zahidə Ağayeva ilə ailə həyatı qurub, iki oğul
atasıdır. 1996-cı ildən sonra Abbasın arvadı ilə münasibətləri
kəskin pozulmuşdu. Mübahisənin səbəbi isə Abbasın həyat yoldaşını
pozğunluqda günahlandırması idi. Əslində, Zahidə əxlaqlı qadın idi.
Bu səbəbdən Zahidə ər evini tərk edib uşaqları ilə bir yerdə atası
evinə qayıtmışdı. Həmin vaxtlardan Abbas tək yaşayırdı.
Ailə münasibətləri pozulandan sonra qardaşım içkiyə qurşanmışdı.
Demək olar ki, hər gün sərxoş olurdu. Zahidə özü işləyib uşaqlarını
saxlayırdı. Zahidə bir neçə dəfə uşaqları ilə birlikdə ər evinə
qayıtsa da, münasibətləri pozulduğuna görə yenidən ata evinə
dönürdü. Abbas əvvəllər bir neçə dəfə əlinə tüfəng götürüb
uşaqlarını və arvadını vurmaq üçün tuşlamışdı. Lakin bu hadisənin
baş verməsinin qarşısını almışdıq. Qardaşım olsa da, Abbas bütün
ailə üzvlərinə qarşı pis rəftarda idi, həmişə bizi və öz ailə
üzvlərini söyüb təhqir edirdi.
"Birinci mənə atəş açdı"
Hüseyn deyib ki, hadisə baş verən gün Zahidənin qışqırıq səsinə
onların evinə gedib: "İçəri girəndə birinci mərtəbədə Abbasın
Xəzərin üstünə cummasını, onunla əlbəyaxa olmasını, Zahidənin isə
qışqırdığını gördüm. Abbas yenə də həmişəki kimi sərxoş idi. Onu
Xəzərdən ayırdım. Sonra Abbas evin ikinci mərtəbəsinə qalxdı.
Təxminən bir dəqiqə keçməmiş əlinə tüfəng götürüb pilləkənin
başından yuxarıdan aşağıya mənə tərəf atəş açdı, qırmalar qarın
nahiyəmə və sağ əlimə dəydi.
Aramızdakı məsafə təxminən 2-2,5 metr olardı. Abbas məni vurandan
sonra tüfənglə üstümə gəldi, canımı qurtarmaq üçün oradan çıxıb öz
evimə tərəf qaçdım. Bu vaxt təkrarən atəş açıldığını, Xəzərin və
Zahidənin qışqırdığını eşitdim. Sonra Abbasın mənim arxamca
gəldiyini gördüm. Həyat yoldaşım Sayatı səsləyib Abbasın məni
tüfənglə vurduğunu dedim. Yaralı vəziyyətdə Abbasla əlbəyaxa oldum.
Tüfəng Abbasın əlindən yerə düşdü. Abbas məni itələyib tüfəngi
götürdü, öz həyətlərindəki su quyusuna tərəf getdi və quyunun
yanında Zahidəyə bir dəfə atəş açdı. Zahidənin səsindən Abbasın onu
vurduğunu bildim. Ondan sonra Abbasın hara getməsini görməmişəm.
Oğlum bizi maşına qoyub xəstəxanaya apardı".
"Anamla atamın münasibətləri heç vaxt yaxşı
olmayıb"
Xəzər Abbasov ifadəsində atası tərəfindən həm anasının, həm də
özünün daim incidildiyini göstərib: "Atam İdman məktəbində
direktor, anam Masallı rayon mərkəzi xəstəxanasında tibb bacısı
işləyirdi. Ailədə iki qardaşıq. Böyük qardaşım Bakı şəhərində Ali
hərbi məktəbin 4-cü kursunda oxuyur. Anam istirahət günündən başqa
hər gün işdə olurdu. O, maddi vəziyyəti ilə əlaqədar işləyirdi.
Çünki atam işləsə də, evə pul gətirmirdi. Özümü dərk edəndən bəri
anamla atamın münasibətləri yaxşı olmayıb".
"Abbas, bizi güllələmə"
Oğul ifadəsinə belə davam edib: "Həmin gün atam təxminən saat 21
radələrində sərxoş vəziyyətdə evə gəldi. İçəri girib məni yanına
çağırdı, anama nalayiq söyüşlər söydü. Anam yorğun olduğundan
divanda uzanmışdı. Atamın hərəkətlərindən məni, anamı
qıcıqlandırmaq və evdə mübahisə yaratmaq istədiyini hiss etdim.
Atamı kənarlaşdırmaq üçün sözlərinə əhəmiyyət vermədim. Lakin atam
yenə də mənə söz atmağa başladı. Atama yaxınlaşdım, sərxoş olduğuna
görə qolundan tutaraq öz otağına qaldırmaq istədim. O, üstümə hücum
çəkdi, əlbəyaxa olduq. Səsə əmim Hüseyn gəldi, bizi ayırdı. Sonra
atam ikinci mərtəbəyə qalxdı, tüfəngi götürüb əmimə atəş açdı. Əmim
öz evinə tərəf qaçdı. Atam ikinci atəşi açanda qırmalar yerə dəydi.
Tüfəngi mənə tərəf tuşlayanda qaçıb anamın yaşadığı otaqda
gizləndim. Mənə: "Kişisənsə qaçma"- dedi. Sonra tüfəngi anama
tuşlayıb ona tərəf atəş açdı. Güllə anamın qoluna dəydi. Qanı
axa-axa evin pəncərəsindən bayıra tullandı. Atam anamı tüfənglə
vuranda anam eyvanda olan divanla televizorun arasında dayanmışdı
və "Abbas, bizi güllələmə!" deyib qışqırırdı. Atamsa: "Sizi burda
öldürüb sonra Sayatla Hüseynin canı üçün gedəcəm" deyirdi.
Anam pəncərədən tullanandan sonra ani sakitlik oldu, mən otaqdan
çıxdım. Atam anamın arxasınca gedərək 2-3 dəfə atəş açdı. Anam su
quyusunun yanında qışqıraraq əmim oğlu Hörmüzü köməyə çağırırdı.
Atam yenə də atəşi kəsmişdi, ani sakitlik yaranmışdı. Atəşin
kəsildiyini, atamın geri qayıtdığını fikirləşib həyətə keçmək
istəyəndə atam bağın içərisindən mənə tərəf bir dəfə atəş açdı.
Qırmalar sağ böyrümə və sol qoluma dəydi, xəsarət aldım. Əmimgilə
qaçıb girmək istəyəndə yıxıldım, əmim arvadı Sayat məni içəri salıb
qapını bağladı. Həmin vaxt anam hələ də su quyusunun yanında köməyə
çağırıb qışqırırdı. Atamın psixi xəstəlikdən əziyyət çəkməsi barədə
heç nə deyə bilmərəm. Amma ona elə gəlirdi ki, guya anam ona cadu
elətdirir, o da qorunmaq üçün özünə dua yazdırırdı".
"Camaata özünün 13-cü imam olduğunu deyirdi"
Şahid qismində dindirilən Hörmüz Abbasov ifadəsində əmisinin uzun
illər tək yaşadığını göstərib: "Əmim Abbas 15 ildən çox idi ki, tək
yaşayırdı. Təxminən 2009-cu ilin sonlarında Abbas rəsmi olaraq
arvadından boşandı və məhkəmənin qərarına əsasən Zahidə oğlanları
ilə bir yerdə Abbasın yaşadığı evə köçürüldü. Zahidə evə
qayıtdığına görə əmim bizim ailəmizlə münasibətlərini pozmuşdu. Ona
elə gəlirdi ki, Zahidənin evə qayıtması işini biz qurmuşuq. Abbas
xasiyyətcə normal deyildi. Dostu Çapay vasitəsi ilə özünə güclülük,
güllə keçirməzlik və s. gülünc dualar yazdırırdı. Camaata guya ona
yuxuda vergi verildiyini, 13-cü imam olduğunu deyirdi. Bundan
başqa, Çeçenistanda və Əfqanıstanda muzdlu kimi vuruşması barədə
danışırdı. Əslində isə o hamının gözündə güclü görsənmək üçün belə
edirdi".
Cinayət işinə Bakı Ağır Cinayətlər Məhkəməsində baxılıb. Hakim
Rasim Sadıqovun sədrlik etdiyi kollegiya cinayət işi üzrə mühakimə
olunan Abbas Abbasovun cinayətini tam sübuta yetirilmiş qənaətinə
gəlib.
Abbas Abbasov 15 il müddətinə azadlıqdan məhrum edilib.
Hacı Zeynalov
Publika.Az
-
Region09:20
Tavuşda etiraz başladı: Ermənilər İrəvan-Tbilisi yolunu bağladılar
-
Ekopublika.az08:35
Azərbaycanda yumurta kəskin ucuzlaşdı - SƏBƏB
-
Nida Xəbər 07:50
Blinken Azərbaycanın kəndlərinin qaytarılması ilə bağlı razılaşmanı alqışladı
-
Magazin107:25
Azərbaycanlı aktrisa əzələlərini nümayiş etdirdi - FOTOLAR
-
İdman03:18
“Mançester Yunayted”in ən seksual azarkeşi - FOTOLAR
-
İdman01:45
Məşhur kluba ağır cəza - 18 xalı silindi
-
Sosial01:01
Azərbaycana qaytarılan dörd kəndin sakinləri DANIŞDILAR - VİDEO
-
Qoroskop00:31
Günün qoroskopu: köklü yeniliklər başlanır