DİN müdaxilə etdi - “Baku Escort” bağlandı

Bakıda əxlaqsızlığı yayan “Baku Escort” adlı sayta giriş məhdudlaşdırılıb.

Azərbaycan Daxili İşlər Nazirliyinin mətbuat xidmətinin əməkdaşı Ehsan Zahidov Publika.az-a açıqlamasında saytın fəaliyyətinin dayandırılmasının hüquq mühafizə orqanlarının operativ müdaxiləsi ilə əlaqədar olduğunu təsdiqləyib:

“Bəli, milli adət-ənənələrimizə, xalqımızın yüksək mənəvi dəyərlərinə yad, qətiyyən uyğun gəlməyən hərəkət və halları təbliğ etməyə cəhd göstərən bu saytın qapanması dövlətimizin aidiyyəti qurumlarının, o cümlədən Daxili İşlər Nazirliyinin dərhal və operativ olaraq gördüyü tədbirlərin nəticəsidir”.

Qeyd edək ki, ötən gün mətbuatda əxlaqsızlığı təbliğ edən “Baku Escort” adı altında saytın fəaliyyətə başlaması haqqında məlumat yayılıb. Sayt guya boş vaxtlarını sərfəli və səmərəli keçirmək istəyən insanlar üçün xidmət göstərir. Əslində isə sayt fahişəliyi təbliğ edirdi. Saytda xanımların xidmətləri təklif edilir. Saytda dünyanın bütün yerindən fahişələr təklif olunur.

Rabitə və Yüksək Texnologiyalar Nazirliyinin mətbuat xidmətinin rəhbəri Müşfiq Əmirov bu barədə hüquq-mühafizə orqanlarına müraciət edildiyini bildirmişdi. Daxili İşlər Nazirliyindən də artıq saytla bağlı araşdırmalara başladıqlarını bəyan etmişdilər.

Gülxar