İsrailin raket zərbələri Təbriz sakinlərinin HƏYATINA SON QOYDU

Suriyanın Xüms şəhərində hökumət güclərinə aid aviabazaya İsrailin raket zərbələri nəticəsində 3 iranlı ölüb.

Publika.az xəbər verir ki, bu haqda “Fars” agentliyi bildirib. Agentliyin məlumatına görə, ölənlərdən ikisi Təbriz, biri isə Ahvaz şəhərinin sakinləridir.

Qeyd edək ki, bu gün T-4 hərbi hava bazası raket hücumuna məruz qalıb. Suriyanın dövlət agentliyi olan SANA raket hücumunun ABŞ-ın təcavüzü olduğunu istisna etməsə də, Rusiyanın Müdafiə Nazirliyi aviazərbələrin İsrailin Hərbi Hava Qüvvələri tərəfindən endirildiyini açıqlayıb.

“İsrailin Hərbi Hava Qüvvələrinin iki F-15 təyyarəsi Suriyanın hava məkanına girmədən Livan ərazisindən səkkiz idarə olunan raketlə zərbə endirib", - idarədən bildiriblər.

Rusiya hərbçilərinin məlumatına görə, 3 raket aerodromun qərb hissəsinə düşüb, daha 5-i isə Suriyanın Hava Hücumundan Müdafiə gücləri tərəfindən zərərsizləşdirilib.

Məlumata görə, raket zərbələrinin endirildiyi baza Şərqi Qutada kimyəvi hücumu həyata keçirən təyyarələr tərəfindən istifadə edilirdi. Bazada İran güclərinin olduğu bildirilir.

Ömər Dağlı