Ukraynadan Krım tatarları ilə bağlı VACİB QƏRAR: 2022-2032-ci illər üçün...

Ukrayna Nazirlər Kabineti Krım-tatar dili üzrə Milli Komissiya yaradıb.

Bu barədə Publika.az Nazirlər Kabinetinin qərarına istinadla xəbər verir.

Bildirilir ki, komissiya Reinteqrasiya Nazirliyinin rəhbəri İrina Vereşçukun rəhbərliyi altında çalışacaq.

Komissiya 2022-2032-ci illər üçün Krım-tatar dilinin inkişafı üzrə Strategiyaya uyğun olaraq yaradılıb. Bu məşvərətçi-məsləhət orqanı aidiyyəti dövlət orqanlarının, eləcə də Krım tatar xalqı Məclisinin nümayəndələrinin, elm və təhsil müəssisələrində dilçilərin tərkibində fəaliyyət göstərəcək.

Milli Komissiyanın əsas vəzifələrindən biri YUNESKO tərəfindən qorunmağa ehtiyacı olan dillərdən biri kimi təsnif edilən Krım tatar dilinin qorunmasıdır. Bundan əlavə, o, Krım tatar dilinin fəaliyyət göstərməsi üçün institusional, təşkilati və informasiya təminatı məsələləri üzrə mərkəzi və yerli icra hakimiyyəti orqanlarının fəaliyyətlərinin əlaqələndirilməsinə töhfə verməlidir.

Vereşçuk qeyd edib ki, Krım tatar dili müvəqqəti olaraq işğal olunmuş Krımda təzyiq və repressiyaya məruz qalan Ukraynanın yerli xalqlarından birinin dilidir.

Xatırladaq ki, Rusiya Federasiyasının kriminal səfərbərliyi elan edildiyi gündən 1000-ə yaxın Krım tatarı müvəqqəti işğal olunmuş Krımı zorla tərk edərək Türkiyəyə gedib.

Milli Müqavimət Mərkəzi həmçinin qeyd edir ki, krımlılar Rusiya ordusuna səfərbər olmaqdan imtina edirlər, baxmayaraq ki, ruslar yerli sakinləri həvəsləndirməyə çalışırlar. Xüsusilə, Ukraynaya qarşı döyüşməyə gedənlərə Krımda torpaq sahəsi vəd edilir.

Hüseyn İbadlı