Gürcüstandan Aİ-yə çağırış: Əl çəkin, şantaj mənasızdır

Gürcüstan üçün pul və ya ölkənin Avropa İttifaqına daxil olması ilə bağlı şantaj yolverilməzdir.

Publika.az xəbər verir ki, bunu hakim “Gürcü arzusu” partiyasının baş katibi, Tbilisi meri Kaxa Kaladze deyib.

"Almaniya ölkənin Avropa İttifaqına inteqrasiya yolundan çıxması və etirazların yatırılmasına cavab olaraq Gürcüstanla 237 milyon avro dəyərində layihələri dayandırıb", - bunu isə Almaniyanın Gürcüstandakı səfiri Peter Fişer bildirib.

“İstər pulla şantaj, istər namizəd statusu ilə şantaj, istərsə də danışıqların açılması və ya açılmaması ilə şantaj bizim üçün qəti şəkildə qəbuledilməzdir. Biz dostluq istəyirik, münasibətlər istəyirik və hər şeyin ikitərəfli olmasını istəyirik”, - Kaladze vurğulayıb.

Kaladzenin sözlərinə görə, Gürcüstan hakimiyyəti maliyyələşdirmə məsələsi ilə şantaj olunmaq istəmir.

Kaladze qeyd edib ki, hər hansı sahənin maliyyələşdirilməsində çətinlik yaranarsa, hakimiyyət Gürcüstan sakinlərinə kömək etməyə hazırdır.

“Əgər ehtiyac varsa, istər hansısa sahəyə maliyyə, istərsə də hər hansı yardım, bu gün Gürcüstan büdcəsi buna hazırdır. Biz xalqa yaxın olacağıq və onlara hər cür kömək edəcəyik”, - Kalaldze bildirib.

Adəm Abbaslı