Tramp Tbilisidə kompleks yaradır - 70 mərtəbəli bina tikiləcək

ABŞ prezidenti Donald Trampın şirkəti olan "Trump Organization" Tbilisidə göydələn tikməyi planlaşdırır. O, Gürcüstan paytaxtının ən hündür binası olacaq.

Publika.az xəbər verir ki, bu barədə "Wall Street Journal" (WSJ) məlumat yayıb. Nəşr sözügedən layihənin tərəfdaşlarından birinin nümayəndəsinə istinad edib.

"Wall Street Journal"ın məlumatına görə, "Trump Organization" və tərəfdaşları paytaxtda çoxfunksiyalı kompleks olan "Trump Tower Tbilisi"ni tikmək niyyətindədirlər: "Təxminən 70 mərtəbəli binanın Gürcüstan paytaxtında ən hündür bina olacağı gözlənilir".

Nəşrin məlumatına görə, göydələndə lüks yaşayış yerləri və ticarət məkanları olacaq. Layihə ABŞ-ın memarlıq firması olan "Gensler" tərəfindən və Gürcüstanın "Archi Group" və "Biograpi Living"-in iştirakı ilə hazırlanır: "Layihədə Nyu-Yorkda yerləşən "Sapir Organization" şirkəti də iştirak edir".

Qeyd edək ki, Trampın özü 2017-ci ildən bəri şirkətin gündəlik əməliyyatlarında iştirak etmir. Şirkəti Amerika liderinin oğlu Erik qardaşı ilə birgə idarə edir. Onların hər ikisi vitse-prezident vəzifəsində çalışırlar. Trampın adı isə "Trump Organization"da baş direktor olaraq qalır və o, müəyyən vasitələrlə quruma nəzarət etməyə davam edir.

Müəllif: Tural