Nuhun gəmisinin qalıqları Türkiyədə tapıldı - Foto

Türkiyədə fəaliyyət göstərən tədqiqatçılar ölkənin şərqində, Ağrı dağ massivində Nuh peyğəmbərin gəmisi ilə bağlı mümkün qalıqların aşkar edildiyini ehtimal edirlər.

Publika.az xəbər verir ki, tapıntı Böyük Ağrının 29 km cənubunda yerləşən Durupınar geoloji obyektinin skan edilməsi nəticəsində müəyyən edilib.

Bəzi alimlərin ehtimalına görə, məhz bu ərazidə “Ümumdünya daşqını” nəticəsində su səviyyəsinin enməsindən sonra gəmi sahilə çıxıb. Ərazinin texniki vasitələrlə aparılan xarici skanlaşdırılması nəticəsində dağ süxurunun altında dəhlizlərə və tunellərə bənzər strukturların olduğu müəyyən edilib. Tədqiqatçıların fikrincə, bunlar gəminin göyərtələrinin altındakı otaqlar və keçidlər ola bilər, çünki skan nəticələrində həmin boşluqların müəyyən sistematik qaydada yerləşdiyi görünür.

Bu skanlamanı həyata keçirən tədqiqat qrupundan Endryu Cons Bibliya mətnlərinə əsaslanaraq bildirir ki, Nuhun gəmisi üç göyərtəli olub və aşkar edilən strukturlar bu təsvirə uyğun gələ bilər. Alimlər bu tunelləri daha ətraflı araşdırmaq üçün uzaqdan idarə olunan robotlaşdırılmış qurğu hazırlamağı planlaşdırırlar. Robot yeraltı boşluqlara daxil olaraq onlar barədə daha dəqiq məlumatlar əldə etməlidir. (Trend)