Polislər genişmiqyaslı əməliyyat keçirdilər: 198 nəfər saxlanıldı

Türkiyənin 16 vilayətində eyni vaxtda genişmiqyaslı əməliyyat keçirilib.

Publika.az xəbər verir ki, bu barədə ölkənin Daxili İşlər Nazirliyi məlumat yayıb.

Bildirilib ki, keçirilən əməliyyatlar nəticəsində mütəşəkkil cinayətkar qruplaşmalara ağır zərbə endirilib. Nazirlikdən verilən məlumata görə, 16 bölgədə 16 fərqli mütəşəkkil cinayətkar dəstəyə qarşı aparılan əməliyyatlarda hesablarında 3.5 milyard TL (təxminən 131 mln. manat) köçürmələr qeydə alınan 198 şübhəli ələ keçirilib. Rəsmi açıqlamada bildirilir ki, şübhəlilər sosial şəbəkələr vasitəsilə "investisiya məsləhətçiliyi" adı altında vətəndaşları aldadıb, müəssisələrdən təzyiq və hədə-qorxu yolu ilə qanunsuz gəlir əldə etməyə cəhd göstəriblər.

Bundan başqa, saxlanılanların narkotik vasitələrin mütəşəkkil satışı, qeyri-qanuni mərc oyunlarının təşkili və pul köçürmələrinə vasitəçilik, rəsmi sənədlərin saxtalaşdırılması, silah qaçaqmalçılığı və sələmçilik fəaliyyətləri ilə məşğul olduqları müəyyən edilib. Keçirilən əməliyyatlar çərçivəsində 24 daşınmaz əmlak, 16 daşınan əmlak və 1060 bank hesabına müsadirə qərarı tətbiq edilib. Məhkəməyə çıxarılan şübhəlilərdən 105-i həbs olunub, digərlərinin isə hüquqi prosedurlarının davam etdiyi qeyd olunub.