Tehranda dəhşətli yanğın: çox sayda yaralı var - VİDEO

Tehranın Əndişə rayonunda yerləşən "Arqavan" ticarət mərkəzində yanğın baş verib.

Publika.az xəbər berir ki, bu barədə İranın "Fars" xəbər agentliyi məlumat yayıb.

Mənbənin məlumatına görə, binanın kompozit üzlüklü olması səbəbindən alov ticarət mərkəzinin gövdəsi boyu sürətlə yayılıb. Çoxmərtəbəli binadan yüksələn tüstü paytaxtın qərb rayonlarından və Tehranın peyk-şəhəri olan Kərəcdən də müşahidə edilib. Ticarət mərkəzindəki ziyarətçilər və işçilər təxliyə olunublar.

Yanğını lokallaşdırmaq mümkün olub, hazırda hadisə yerində Əndişənin üç yanğınsöndürmə briqadası və Şəhriyar dairəsinin xilasediciləri işləyir.

Hadisənin başvermə səbəbləri araşdırılır.

"Mehr" agentliyinin məlumatına görə, Qırmızı Aypara Cəmiyyətinin doqquz komandası yanğın nəticəsində itkin düşənlərin axtarışı ilə məşğuldur. Həmçinin bildirilir ki, dairə prokuroru Mehdi Məhəmmədi binanın inşaatçısının həbsi barədə order verib.

Son məlumata görə, on nəfər xəsarət alıb. Onlardan biri xəstəxanaya yerləşdirilib.

Hüseyn İbadlı