Sərhədlər açılır: Ermənistan bazarını bu türk qardaşlar nəzarətə götürəcək

Bəzi məlumatlara görə, Türkiyə tərəfi 7 iyun tarixinə qədər Ermənistanla sərhədlərin açılması üçün addımlar atmağa hazırlaşır.

Publika.az xəbər verir ki, Türkiyə ilə sərhədlərin açılması Ermənistanda bəzi qüvvələri qorxudub. Ya da onlar bilərəkdən əhali arasında xof yaradır.

“Hraparak”da dərc edilmiş yazını da bu qəbildən saymaq olar. Məqalədə bildirilir ki, sərhədlərin açılacağı xəbərlərinin yayılması fonunda türk iş adamları Ermənistan bazarını araşdırmağa başlayıblar.

“Onlar digər addımları da nəzərdən keçirirlər. Məsələn, Ermənistana hansı türk məhsullarını idxal edə biləcəklərini görmək üçün Ermənistan bazarını araşdırırlar. Ümumiyyətlə, onlar bazarımızı tamamilə öz nəzarətlərinə almağı planlaşdırırlar və yalnız kənardan monitorinq aparmırlar, həm də səfərlər edirlər. Türkiyə mənbələrinə görə, sərhədlərin açılması halında Ermənistan bazarını türk malları ilə doldurmaq vəzifəsinə İğdırda yaşayan və fəaliyyət göstərən Bahar soyadlı iş adamı olan üç qardaş rəhbərlik edir.

Qardaşlardan biri olan Osman Bahar Qərbi Anadolu Təşkilatına daxil olan ixracatçılardan biridir. Qardaşların Naxçıvan, İğdır, Rizə və Sakaryada şirkətləri var. Onlar qida, məişət kimyəvi maddələri, tikinti materialları və kənd təsərrüfatı məhsulları istehsal edirlər. Diqqətəlayiq haldır ki, aldığımız məlumata görə, bu üç qardaş artıq bir neçə dəfə İrəvana səfər edib, müəyyən dairələrlə görüşlər keçirib və riskləri qiymətləndiriblər. Artıq dostları vasitəsilə pilot müqavilə bağlaya bildikləri və bəzi malları “Argo Group MMC” vasitəsilə idxal etdikləri barədə məlumatlar var”, - məqalədə deyilir.

Müəllif: Tural