Ermənistanı Azərbaycan və Türkiyədən “qoruyacaq” plan - İranla birgə hazırlanıb

Ermənistan Azərbaycan və Türkiyədən birtərəfli kommunikasiya asılılığına son qoya, iqtisadi təzyiqlərini azalda, danışıqlar mövqeyini əhəmiyyətli dərəcədə gücləndirə və suverenliyini möhkəmləndirə bilər.

Publika.az xəbər verir ki, bu barədə Erməni Milli Konqresinin proporsional namizədlər siyahısına rəhbərlik edən Levon Zurabyan “Facebook” səhifəsində məlumat verib.

O, belə bir planın 2019-cu ildə Nikol Paşinyana təklif edildiyini, lakin onun bunu rədd etdiyini bildirib.

O izah edib ki, Erməni Milli Konqresinin seçki proqramına Ermənistanı İranla birləşdirən dəmir yolunun tikintisi daxildir və bu, Ermənistan üçün həyati əhəmiyyətli problemləri həll edəcək.

Onun sözlərinə görə, tikinti şirkəti "China Communications" tərəfindən layihələndirilən dəmir yolunda 84 körpü, 60 tunel olacaq və ilkin dəyəri 3,2 milyard dollar olacaq ki, bu da layihədə iştirak edən ölkələrə, əsasən Ermənistan və İrana əhəmiyyətli fayda gətirəcək.

Zurabyan qeyd edib ki, “Bu dəmir yolu Ağarak şəhərini Qaqarin dəmir yolu stansiyası ilə birləşdirəcək. İrəvanın Qavar, Martuni, Cermux, Sisyan, Qafan və Meğri şəhərləri ilə də dəmir yolu əlaqələri olacaq ki, bu da ölkənin iqtisadi, müdafiə və təhlükəsizlik sistemlərini gücləndirəcək və bu icmaların iqtisadi həyatını canlandıracaq”.

O vurğulayıb ki, İran vasitəsilə Ermənistan Hind okeanındakı limanlara çıxış əldə edəcək ki, bu da Ermənistanla Qlobal Cənub ölkələri arasında ticarət və iqtisadi əlaqələrin əhəmiyyətli dərəcədə inkişafına səbəb olacaq, Ermənistan istehsalı olan mallar üçün yeni marşrutlar və bazarlar açacaq. Ermənistan həmçinin Qara dənizi Fars körfəzi ilə birləşdirən mühüm tranzit ölkəsinə çevriləcək ki, bu da ölkənin iqtisadi inkişafını əhəmiyyətli dərəcədə sürətləndirəcək.

Aşkar görünür ki, Zurabyanın bu utopik layihəsi sırf seçki təbliğatı üçündür. Təkcə bir fakt bu layihənin kağız parçasından ibarət olduğunu təsdiqləyir: Nə Ermənistanın, nə də İranın ilkin qiymətləndirməsi 3,2 milyard olan bir layihəni gerçəkləşdirmək potensialı yoxdur.

Müəllif: Tural