Makronun səfəri zamanı qalmaqal: Gümrüdə nə baş verib?

Fransa prezidenti Emmanuel Makronun Gümrüyə səfəri zamanı qalmaqal yaşanıb.

Publika.az “Hraparak” nəşrinə istinadla xəbər verir ki, mayın 5-də, İrəvanda başlayan sammitdən bir gün sonra Makron və Paşinyan Gümrüyə səfər ediblər.

Makronun Gümrüyə səfər zamanı şəhərin 10 nömrəli məktəbinə ekskursiya planlaşdırılıb. Bu məktəb Fransa üslubundadır və 1988-ci ildə baş verən dağıdıcı zəlzələdən sonra Fransa hökumətinin səyləri ilə tikilib. Lakin səfər baş tutmayıb.

“Təxminən üç ay ərzində məktəbin müəllim heyəti və şagirdləri Fransa prezidenti və Ermənistan baş nazirinin birgə səfərinə hazırlaşıblar, hətta məktəbi kosmetik cəhətdən təmir ediblər, səfər günü ciddi təhlükəsizlik tədbirləri görülüb, ərazini sözün əsl mənasında yoxlayıblar və metal detektorlarla ətraflı yoxlamadan sonra bütün müəllim və şagirdlərin məktəbə girməsinə icazə verilib. Son anda məktəb heyətinə Makronun gəlməyəcəyi bildirilib.

Əslində, vertolyotla Gümrüyə yola düşən Makron və onun nümayəndə heyəti təyin olunmuş vaxtda orada olublar, lakin Paşinyan gecikib və məktəbə səfər onun gecikməsi səbəbindən ləğv edilib”, - nəşr bildirib.

Makronun işçiləri məktəb direktoruna salamlama nitqini və təşkil olunmuş tədbiri axşam konsertin keçiriləcəyi Vardanants Meydanına köçürməyi təklif ediblər. Onlar Fransa prezidentinin cədvəlinin dolu olduğunu, buna görə də planlaşdırılan proqramdan kənara çıxa bilməyəcəklərini deyiblər. Məktəb rəhbərliyi razılaşıb. Fəxri qonaqdan dəvət aldıqdan sonra məktəb şagirdləri və müəllimləri Vardanants Meydanına yola düşərək Makronun səfəri üçün hazırladıqları tədbiri səhnədən təqdim etmək üçün səhnə arxasına keçməyə çalışıblar.

Lakin burada da Paşinyanın mühafizəçilərinin müqaviməti ilə qarşılaşıblar.

“Məsələ burasındadır ki, Paşinyan səhnədən danışmalı və sonra konsert keçirilməli idi, ona görə də ərazi onun mühafizəçiləri tərəfindən mühasirəyə alınıb. Direktor dəvətin fransız qonaqdan olduğunu izah etməyə çalışıb, amma ona qarşı fiziki təzyiq göstərilib. Makronun cangüdənləri müdaxilə edərək onu Fransa prezidentinin dəvət etdiyini bildirdilər və Paşinyanın mühafizəçilərinin kobud davranışından şoka düşüblər. Beləcə, məktəbin hazırladığı proqram təqdim edilməyib. Onlar Fransa prezidenti ilə sadəcə şəkil çəkdirməklə kifayətləniblər”, - məqalədə qeyd olunub.

Müəllif: Tural