Ərdoğan imzaladı: Türkiyədə məşhur universitet bağlandı

Türkiyədə “Can Holdinq”ə daxil olan İstanbul Bilgi Universiteti (İstanbul Bilgi Üniversitesi) bağlanıb.

Publika.az xəbər verir ki, bu məlumatı "Hürriyet" qəzeti rəsmi sənədlərə istinadən dərc edib.

Qeyd olunub ki, universitetin fəaliyyət lisenziyasının ləğvi qərarı Prezident Rəcəb Tayyib Ərdoğan tərəfindən təsdiqlənib.

Mövcud məlumata görə, universitet təxminən 210.000 kvadrat metr ərazini əhatə edir. Hazırda universitetdə 20.000-dən çox tələbə təhsil alır, 70.000-dən çox məzun var və 1000-dən çox müəllim heyəti çalışır. Bundan əlavə, təhsil müəssisəsi səkkiz fakültə, üç institut, üç peşəkar ali məktəb və subbakalavr, bakalavr və magistr səviyyələrində təhsil verən 150-dən çox proqramdan ibarətdir.

"Milliyet" qəzeti xəbər verir ki, Bilgi tələbələri təhsillərini Memar Sinan Gözəl Sənətlər Universitetində davam etdirəcəklər və bu universitet təhsillərini başa vurmalarının rəsmi qarantı olacaq.

Türkiyə qanunlarına görə, universitetin təsis fondunun qəyyumu təyin edilən akkreditə olunmuş təhsil müəssisəsi dövlətə məxsus müəssisə olmalıdır.

“BBC Türk” Xidməti bu qərarı Bilgi Universitetinin sahibi “Can Holdinq” şirkətinin çirkli pulların yuyulması, vergidən yayınma və mütəşəkkil cinayətkarlıqla əlaqələrində şübhəli bilinməsi ilə əlaqələndirir. Şirkətin aktivləri dondurulub və xarici administrator təyin edilib.

Müəllif: Tural