Türkiyə dəniz qeyri-adi bir rəngə boyandı - FOTO

Türkiyənin Giresun vilayətində yağan güclü yağışlardan sonra Qara dənizin suları qəhvəyi rəngə boyanıb.

Publika.az xəbər verir ki, bu barədə yerli "Habertürk" telekanalı məlumat yayıb.

Kanalın saytında dron vasitəsilə havadan çəkilmiş görüntülər yayımlanıb. Məlumata görə, güclü yağış nəticəsində yuyulan lil və torpaq qatı Aksu və Batlama çayları vasitəsilə dənizə axaraq suyun rənginin bulanıqlaşmasına səbəb olub.

"Habertürk" qeyd edir ki, ərazinin relyefi və torpaq quruluşuna görə, şiddətli yağışlardan sonra dənizdə belə dəyişikliklərin baş verməsi Giresun üçün adi haldır.

Giresun Türkiyənin şimal-şərqində, Qara dəniz sahilində yerləşən bir şəhərdir. Bura Antaliya və ya Alaniya kimi Aralıq dənizi sahilindəki məşhur turizm mərkəzləri ilə müqayisədə turistlər, xüsusilə də xarici qonaqlar üçün populyar kurort hesab olunmur. Şəhərin çimərlikləri və infrastrukturu ənənəvi kurortlarla müqayisədə daha sadədir. Buraya əsasən yerli sakinlər və lüks istirahətdən daha çox təbii mühit axtaran müstəqil səyyahlar üz tutur.

Hüseyn İbadlı