Paşinyandan AİB liderinin Ermənistanla bağlı bəyanatına reaksiya: Balanslıdır

Ermənistanın Baş naziri Nikol Paşinyan Rusiya, Belarus, Qazaxıstan və Qırğızıstan liderlərinin Ermənistanın Avrasiya İqtisadi Birliyinə üzvlüyü ilə bağlı bəyanatını balanslı adlandırıb.

Publika.az xəbər verir ki, o, bunu Geqarkunik bölgəsində seçki kampaniyası zamanı "İzvestiya" qəzetinə verdiyi müsahibədə bildirib.

Dörd AİB ölkəsinin liderlərinin 29 mayda Kremlin saytında ittifaqın zirvə toplantısından sonra verdiyi bəyanat dərc edilib. Sənəddə qeyd olunur ki, Ermənistan "Avropa İttifaqına qoşulmaqla AİB-də qalmaq arasında seçim etmək üçün milli referendum keçirməlidir".

“Bu, çox balanslaşdırılmış mətndir. Görünür, dörd AİB ölkəsindən olan həmkarlarımız Ermənistanda Avropa İttifaqına qoşulmaqla bağlı referendum keçirilməsi ideyasını dəstəkləyirlər. Lakin Ermənistan rəsmi olaraq Aİ-yə tam üzvlük üçün müraciət edənə qədər belə bir referendumun keçirilməsinin mənası yoxdur. Bu baş verənə qədər referendum olmayacaq”, - deyə Paşinyan bildirib.

Onun sözlərinə görə, Avropa Birliyinə qoşulmaqla bağlı müzakirələr yalnız Ermənistan namizəd statusu aldıqdan və rəsmi olaraq Aİ-yə ərizə təqdim etdikdən sonra mümkündür.

Ermənistanın AİB üzvlüyünün faydalarını başa düşüb-düşmədiyi soruşulduqda, Paşinyan müsbət cavab verib. O hesab edir ki, mövcud şərtlər daxilində birlik Ermənistan üçün yeni imkanlar yaratmalı və cəmiyyətinə cəlbediciliyini artırmalıdır.

Baş nazir həmçinin qeyd edib ki, tətbiq olunan məhdudiyyətlər, onun fikrincə, "Ermənistan vətəndaşları arasında AİB-ə qarşı mənfi münasibət yaradır və siyasi çalar qazanır".

“Düşünürəm ki, bunlar səhv addımlardır. Onlar insanları AİB-ə qarşı qaldırırlar. Və mənim üçün, AİB-in yüksək vəzifəli rəsmisi kimi, bu, problemdir”, - Paşinyan bildirib.

Müəllif: Tural