Aİ Rusiyanın acığına Ermənistana vəd verdi: 50 milyon avro, Avropa bazarına çıxış

Avropa Komissiyasının prezidenti Ursula fon der Lyayen Ermənistanın baş naziri Nikol Paşinyanla telefon danışığı aparıb.

Publika.az xəbər verir ki, bu barədə Avropa Komissiyasının mətbuat xidməti məlumat yayıb.

Məlumata görə, tərəflər Ermənistanın Avropa İttifaqı ilə yaxınlaşması fonunda Rusiyanın ölkəyə təzyiqlərini müzakirə ediblər.

Danışıq zamanı Rusiyanın Ermənistanın bir sıra məhsullarına, o cümlədən meyvə, tərəvəz, gül və konyak idxalına tətbiq etdiyi məhdudiyyətlər gündəmə gətirilib. Ursula fon der Lyayen Moskvanın bu addımlarını “iqtisadi məcburetmə” adlandıraraq qəbuledilməz olduğunu bildirib.

“Ermənistan məhsullarına ixrac məhdudiyyətlərini genişləndirməklə Moskva iqtisadi əlaqələrdən siyasi təzyq vasitəsi kimi istifadə edir. Biz bu yanaşmanı çox yaxşı tanıyırıq. Məhz buna görə Avropa Ermənistanın yanında qətiyyətlə dayanır”, - deyə Avropa Komissiyasının rəhbəri vurğulayıb.

Fon der Lyayen həmçinin Ermənistan üçün yeni dəstək paketini açıqlayıb. Onun sözlərinə görə, Avropa İttifaqı ölkəyə dərhal 50 milyon avrodan çox maliyyə yardımı ayıracaq.

Bundan əlavə, Ermənistan məhsullarının, xüsusilə kənd təsərrüfatı mallarının Avropa bazarına çıxışının asanlaşdırılması istiqamətində əlavə tədbirlərin görüləcəyi qeyd olunub.

Adəm