Çarukyan: "Xalq cana yığılıb!"

Xəbər verdiyimiz kimi Ermənistanda Parlament seçkiləri keçirilir.

Publika.az xəbər verir ki, "Çiçəklənən Ermənistan" partiyasının lideri Qaqik Çarukyan parlament seçkilərində səs verdikdən sonra jurnalistlərə açıqlama verib. Vətəndaşlıq borcunu yerinə yetirdiyinid eyən partiya lideri ölkədəki arzuolunmaz siyasi durumdan gileylənib. Jurnalistlər ondan kollektiv müxalifətin hakim qüvvələri seçkidə məğlub etmək şansının olub-olmadığını soruşublar. Siyasətçi deyib ki, "bu, mütləqdir!".

Ofis və evlərdə aparılan axtarışlar və həbslər barədə danışan siyasətçi deyib: "İnsanları tamamilə əsassız yerə, heç bir səbəb olmadan aparıblar. Lakin bu, problemin həlli yolu deyil. Xalq artıq cana yığılıb, siyasi dəyişiklik istəyir".

Qeyd edək ki, Ermənistan parlamenti proporsional təmsilçilik, yəni, yalnız partiya siyahıları ilə seçilir. Ermənistan parlamentinin 9-cu çağırışında yerlər uğrunda 18 siyasi qüvvə mübarizə aparır: 16 partiya və 2 blok. Partiyaların parlamentə keçmək üçün həddi 4 faiz, bloklar üçün isə 8 faiz olaraq müəyyən edilib. Yekun seçki nəticələri hesablanarkən etibarsız və qəsdən korlanmış bülletenlər sadəcə olaraq buraxılır və nəzərə alınmır. Partiyaların aldığı faizlər yalnız etibarlı bülletenlərin ümumi sayı əsasında müəyyən edilir.

Müəllif: Tural