Paşinyanın partiyasında kreslo mübarizəsi başladı: Əsas hədəf bu postdur

Ermənistanın hakim “Mülkü Müqavilə” Partiyasının daxilində artıq gələcək parlamentdə əsas vəzifələr uğrunda mübarizə başlayıb.

Publika.az xəbər verir ki, bu barədə “Hraparak” qəzeti məlumat yayıb.

Nəşrin məlumatına görə, yeni parlamentin hələ formalaşmamasına baxmayaraq, partiya daxilində əsas vəzifələrin bölüşdürülməsi fəal şəkildə müzakirə olunur. Qeyd olunur ki, partiya siyahısında ilk 30-35 yeri tutan namizədlərin parlament yerləri alması faktiki olaraq təmin edilib.

Qəzetin məlumatına görə, xüsusi diqqət Milli Assambleyanın sədrinin vəzifəsinə yönəlib.

"Mülkü Müqavilə” hazırkı fraksiya lideri Hayk Konjoryanı bu vəzifəyə ən uyğun namizəd hesab edir, bəzi partiya üzvləri isə hazırkı spiker Simonyanın istefa verməli olduğunu düşünür. Vitse-spiker Ruben Rubinyan da bu vəzifə uğrunda mübarizə aparır, lakin partiya onu həddindən artıq qarşıdurmaçı və həmişə konstruktiv ünsiyyət qura bilməyən hesab edir", - deyə nəşr yazır.

Eyni zamanda, Ermənistanın ABŞ-dakı keçmiş səfiri Lilit Makuntsun namizədliyi nəzərdən tamamilə çıxarılmayıb, baxmayaraq ki, onun təyin olunma ehtimalı aşağı qiymətləndirilir.

Ermənistan mediası əvvəllər Makuntsun parlament spikeri vəzifəsinə əsas namizədlərdən biri hesab edildiyini bildirmişdi.

Ermənistanda parlament seçkiləri iyunun 7-də keçirilib.

Mərkəzi Seçki Komissiyasının ilkin məlumatlarına görə, Nikol Paşinyanın hakim “Mülkü Müqavilə” partiyası səslərin 49,825%-ni toplayıb. Biznesmen Samvel Karapetyanın müxalifət bloku olan “Güclü Ermənistan” 23,281%, keçmiş prezident Robert Köçəryanın “Ermənistan” bloku isə 9,934% səs toplayıb.

Müəllif: Tural