Ermənistan Rusiya sərhədçiləri ilə bağlı iddialara nöqtə qoydu

Ermənistan Milli Təhlükəsizlik Xidməti (MTX) Rusiya sərhədçilərinin fəaliyyəti ilə bağlı yayılan iddialara münasibət bildirib və onların hərəkətlərinin qanunauyğun olduğunu təsdiqləyib.

Publika.az xəbər verir ki, bu barədə Ermənistan MTX-nin mətbuat xidməti NEWS.am-ın sorğusuna cavabında məlumat verib.

Xatırladaq ki, iyunun əvvəlində sosial şəbəkələrdə Rusiya sərhədçilərinin Sünik vilayətinin Nrnadzor kəndinə bir qrup şəxsin girişinə qanunsuz şəkildə mane olduğu barədə məlumatlar yayılmışdı. “Facebook” paylaşımlarında iddia olunurdu ki, iyunun 7-də keçirilən seçkilər ərəfəsində Avropa ölkələrinin və Ermənistanın bir qrup vətəndaşının kəndə daxil olmasına icazə verilməyib.

Məlumatlarda giriş qadağasının səbəbi kimi həmin şəxslərin yerli qeydiyyatının və ya xüsusi buraxılış sənədinin olmaması göstərilib.

Məsələyə aydınlıq gətirən Ermənistan MTX bildirib ki, ölkə hökumətinin 12 may 2011-ci il tarixli 735-Ն saylı qərarına əsasən, sərhədyanı zonalara vətəndaşların və nəqliyyat vasitələrinin daxil olması yalnız şəxsiyyəti təsdiq edən sənədlər və fərdi və ya qrup halında verilən buraxılış əsasında mümkündür.

Qurum qeyd edib ki, həmin qərarla buraxılış və icazələrin verilməsi qaydaları da müəyyənləşdirilib və bu səbəbdən sərhədçilərin hərəkətlərində pozuntu aşkarlanmayıb.

Adəm