Xameneinin vida mərasimində yüzlərlə məhbus azad ediləcək

İranda ölkənin həlak olmuş ali lideri Ayətullah Əli Xamenei ilə vida mərasimləri günlərində ən azı 850 məhbusun əfv olunması barədə qərar qəbul edilib.

Publika.az xəbər verir ki, bu barədə İranın Pul Kompensasiyalarının Ödənilməsi üzrə Xalq Qərargahının Himayədarlar Şurasının sədri Seyid Əsədulla Culayi məlumat verib.

Onun sözlərinə görə, ölkənin bütün 31 vilayətindən daxil olan işlərə baxılıb və xüsusi iclasın yekununda azadlığa buraxılacaq şəxslərin siyahısı təsdiqlənib.

Bildirilib ki, əfv edilənlər arasında maliyyə öhdəliklərinə görə həbs olunan 520 nəfər, həmçinin nikah müqavilələri və aliment ödənişləri ilə bağlı məhkum edilmiş 330 nəfər var. Məlumata görə, söhbət əsasən qəsdən törədilməyən və yüngül xarakterli hüquq pozuntularından gedir.

Əli Xamenei ilə vida mərasimləri iyulun 3-dən Tehran şəhərində başlayacaq. Tədbirlərdə 30-dan çox ölkədən yüksək səviyyəli nümayəndə heyətlərinin iştirakı gözlənilir.

İyulun 4-5-də mərhum liderin cənazəsi Mosalla Tehran kompleksində yerləşdiriləcək və vətəndaşlar onunla vidalaşa biləcəklər. İyulun 6-da Tehranda matəm yürüşü keçiriləcək, daha sonra cənazə İranın əsas dini mərkəzi olan Qum şəhərinə aparılacaq.

Dəfn mərasiminin iyulun 9-da Xameneinin doğulduğu Məşhəd şəhərində keçirilməsi planlaşdırılır.

Adəm