Kürdlər İrana daxil oldular - Şiddətli döyüşlər başladı, ölənlər var

SEPAH ölkənin şimal-qərbində həyata keçirilən əməliyyat zamanı diversiya törətmək məqsədilə İran ərazisinə daxil olmağa çalışan silahlı qrupun tamamilə zərərsizləşdirildiyini açıqlayıb.

Publika.az xəbər verir ki, SEPAH-ın “Həmzə Seyid əş-Şühəda” qərargahının bəyanatında bildirilir ki, əməliyyat İran Kürdüstanı Demokrat Partiyası ilə əlaqəli olduğu iddia edilən silahlı dəstənin sərhədi keçərək ölkə ərazilərinə daxil olmasından sonra həyata keçirilib.

Məlumata əsasən, qrup kəşfiyyat tədbirləri nəticəsində müəyyən olunub və sonradan İran qüvvələrinin təşkil etdiyi pusquya düşüb. Hadisə Piranşəhr şəhəri yaxınlığındakı dağlıq ərazidə atəş dəstəyi ilə keçirilən əməliyyat zamanı baş verib.

SEPAH-ın məlumatına görə, beş nəfərdən ibarət qrupun bütün üzvləri öldürülüb. Əməliyyat zamanı onların silah və sursatı da müsadirə edilib.

Qurum bəyan edib ki, İranın şimal-qərb sərhədlərində təhlükəsizliyi pozmağa yönələn istənilən cəhd bundan sonra da qətiyyətlə qarşısı alınacaq. (Globalinfo.az)