“Heç bir gizli təmas olmayıb” - Kreml Avropa liderindən ZƏNG GÖZLƏYİR

Moskva dialoqa açıqdır və gözləyir ki, Fransa Prezidenti Emmanuel Makron niyyətləri barədə növbəti bəyanatından sonra nəhayət ki, Rusiya Prezidenti Vladimir Putinə zəng edəcək.

Publika.az xəbər verir ki, bu barədə Kremlin mətbua xidmətinin rəhbəri Dmitri Peskov "Die Weltwoche"yə verdiyi müsahibədə bildirib.

O, əlavə edib ki, Rusiya tərəfinin Makron və Almaniyanın federal kansleri Fridrix Merts ilə heç bir gizli təması olmayıb.

İyun ayında məlumat verilmişdi ki, Ukrayna böhranının tənzimlənməsi ilə bağlı Rusiya ilə dialoqun bərpası ehtimalı səbəbindən Avropa İttifaqı yenidən iki düşərgəyə bölünüb. "Politico" qəzeti xəbər verir ki, Fransa və Almaniya Moskva ilə təmasların əleyhinə çıxıblar. Daha əvvəl məlum olmuşdu ki, Avropa Şurasının sədri Antoniu Koşta Kremlə Aİ ilə Rusiya arasında birbaşa əlaqə kanalı yaratmaq xahişi ilə müraciət edib.

Fevral ayında Makron bildirmişdi ki, Putinlə təmaslara hazırlıq texniki səviyyədə aparılır. Fransa lideri qeyd edib ki, buna paralel olaraq Avropalı tərəfdaşlar və Ukrayna Prezidenti Volodimir Zelenski ilə məsləhətləşmələr aparılır.

Hüseyn İbadlı