İran ABŞ-ın PUA-sını vurdu

İslam İnqilabı Keşikçiləri Korpusunun (SEPAH, İran Silahlı Qüvvələrinin elit hissələri) Hava Hücumundan Müdafiə (HHM) vasitələri İranın Buşehr əyalətində yerləşən Xormuc şəhəri üzərindəki səmada ABŞ-a məxsus "MQ-9" pilotsuz uçuş aparatını məhv edib.

Publika.az "Tasnim" agentliyinə istinadla xəbər verir ki, bu barədə SEPAH-ın nümayəndəsi Hüseyn Mohebi məlumat verib.

Onun sözlərinə görə, PUA sübh çağı zərərsizləşdirilib.

Bundan bir qədər əvvəl ABŞ Silahlı Qüvvələrinin Mərkəzi Komandanlığı (CENTCOM) Amerika hərbçilərinin İrana qarşı yeni silsilə zərbələri başa çatdırdığını bəyan etmişdi. Hücum zamanı 80-dən çox hədəfin vurulduğu bildirilib. CENTCOM bu zərbələri "İranın Hörmüz boğazından keçən ticarət gəmilərinə etdiyi son hücumlara cavab" adlandırıb.

Xəbər verildiyi kimi, Hörmüz boğazındakı İranın Qeşm adasında, həmçinin İranın cənubundakı Xarq adasında partlayışlar baş verib. Bundan əlavə, İslam Respublikasının Bəndər-Abbas və Sirik şəhərlərində də bir neçə partlayış qeydə alınıb.

Hüseyn İbadlı