Paşinyandan yeni Konstitusiya ilə bağlı açıqlama: Mətnin dərci niyə təxirə salınıb?

Ermənistanın yeni Konstitusiyasının layihə mətni ilin sonuna qədər dərc olunacaq.

Publika.az xəbər verir ki, bunu Baş nazir Nikol Paşinyan cümə axşamı keçirilən brifinqdə bildirib.

Ermənistan hökumətinin başçısı qeyd edib ki, Konstitusiyaya dəyişiklik məsələsi hakim partiyanın seçki platformasına daxil edilib və onun fikrincə, "xalqın etimadını" qazanıb. Baş nazirin sözlərinə görə, parlamentdəki güc balansı konstitusiya dəyişikliklərinin yalnız daxili parlament mexanizmləri vasitəsilə edilməsinə imkan vermir (hakim partiya yerlərin üçdə ikisindən azını qazanıb), lakin hakim partiya bu məsələni həll etməlidir.

Yazda layihənin demək olar ki, hazır olduğu barədə xəbərlərə baxmayaraq, niyə hələ də dərc olunmadığı soruşulduqda, Paşinyan bildirib:

“Mülkü Müqavilə” Partiyasının idarə heyətinin üzvləri mətnlə bağlı təkliflər irəli sürüblər, lakin partiya onları seçkiqabağı müzakirə etməmək qərarına gəlib. Bu müzakirələrin seçkidən sonrakı dövrə qədər təxirə salınması qərara alınıb.

Təkliflərin təqdim edilməsi üçün son tarix başa çatıb və onlarla bağlı müzakirələr demək olar ki, başa çatıb. Hazırda onlardan yalnız biri üzrə müzakirələr davam edir.

Bundan sonra mətni dərc edəcəyik. Konkret bir müddət deməyəcəyəm, amma yalnız ilin sonuna qədər mətni dərc edəcəyimizi deyə bilərəm", - baş nazir bildirib.

Xatırladaq ki, 2026-cı ilin mart ayında ədliyyə naziri Srbuhi Qalyan yeni Konstitusiya üzərində işlərin başa çatdığını bildirmişdi. O, həmçinin Konstitusiyanın ayın sonuna qədər dərc olunacağını da iddia etmişdi.

Müəllif: Tural