İranın şəhərlərində partlayışlar baş verir

İranın cənubunda yerləşən Buşehr və Çoqadak şəhərləri rayonunda iki partlayış səsi eşidilib.

Publika.az xəbər verir ki, bu barədə İranın "Mehr" agentliyi məlumat yayıb.

"Bir neçə dəqiqə əvvəl Buşehr və Çoqadak şəhərləri rayonunda iki partlayış baş verib", - deyə xəbərdə bildirilir.

Agentliyin məlumatına görə, partlayışlar İranın cənubundakı Konarak şəhərində də baş verib.

İyulun 8-də ABŞ prezidenti Donald Tramp NATO sammiti çərçivəsində bəyan edib ki, Vaşinqtonla Tehran arasında atəşkəs artıq qüvvədə deyil. İrana qarşı zərbələrin bərpasından sonra Amerika lideri bu ölkənin rəhbərliyinə qarşı son vaxtlar səslənən ən sərt çıxışlardan birini edib. O, iranlıları "xəstə insanlar" və "cəmiyyətin tullantıları" adlandırıb, həmçinin İslam Respublikasını Yaxın Şərqdə sabitlik naminə aradan qaldırılmalı olan "xərçəng şişi" ilə müqayisə edib. Amerika lideri həmçinin bildirib ki, artıq danışıqlar aparmaqda məna görmür.

Həmin gün ABŞ Silahlı Qüvvələrinin Mərkəzi Komandanlığı (CENTCOM) bəyan edib ki, amerikalı hərbçilər İrana qarşı yeni silsilə zərbələri başa çatdırıblar. Qurum dəqiqləşdirib ki, 80-dən çox hədəf hücuma məruz qalıb. CENTCOM bu zərbələri "İranın Hörmüz boğazından keçən ticarət gəmilərinə qarşı son hücumlarına cavab" adlandırıb.

Hüseyn İbadlı