Simonyana “torba”nı onlar tikibmiş - Adları açıqlandı

“Mülkü Müqavilə” partiyasının təxminən iyirmi nümayəndəsi Ermənistan Parlamentinin spikeri Alen Simonyana qarşı fəal şəkildə kampaniya aparıb və Baş nazir Nikol Paşinyanın onu vəzifəsindən uzaqlaşdırmaq qərarına təsir göstərə bilib.

Publika.az xəbər verir ki, bu barədə “Jogovurd” qəzeti mənbələrə istinadən məlumat yayıb.

Nəşrin məlumatına görə, son aylarda hakim partiyanın üzvləri Paşinyana Simonyan haqqında kompromat xarakterli materiallar təqdim ediblər. Bu materiallarda korrupsiya sövdələşmələri, tərəfkeşlik, klan sisteminin yaradılması və qadınların da daxil olduğu partiya yoldaşlarının alçaldılması halları iddia olunur.

Qəzetin məlumatına görə, baş nazirin mövqeyinə Simonyan və ailə üzvlərinin sərvətinin kəskin artması ilə bağlı çoxsaylı media xəbərləri də təsir edib.

“Baş nazir, partiya daxilindəki əhval-ruhiyyəni nəzərə alaraq, komandanın əhəmiyyətli bir hissəsinin mövqeyinə qarşı çıxmaq istəmədi”, - deyə nəşr yazır.

Nəşrin məlumatına görə, Simonyanın əleyhinə çıxış edən deputatlar bunlarıdr: Hayk Sarkisyan, Armen Xaçatryan, Ayik Koncoryan, Ripsime Unanyan, Ruben Rubinyan, Culyetta Azaryan, Lusine Badalyan, Zarhi Batoyan, Ripsime Qriqoryan, Arpi Davoyan, Lilit Minasyan, Lilit Stepanyan, Andranik Köçəryan, Eriknaz Tiqranyan, Ayk Tirunyan, yüksək texnologiyalar sənayesi naziri Mxitar Ayrapetyan və keçmiş deputat Vilen Qabrielyan.

Alen Simonyan 2021-ci ildən Parlamentin sədri vəzifəsində çalışır. O, parlament seçkilərində "Mülkü Müqavilə" partiyasının siyahısında 14-cü yerdə idi və kampaniyada fəal iştirak edirdi, lakin nəticələr elan edildikdən sonra partiyanın idarə heyəti onu vəzifəsindən uzaqlaşdırmaq qərarına gəldi. O, həmçinin mandatından imtina etdi və fasilə vermək və "nəhayət ki, şəxsi həyatını nizama salmaq" niyyətində olduğunu bildirdi.

Daha əvvəl Ermənistan Parlamentinin sədri vəzifəsini hakim partiyadan hazırkı vitse-spiker Ruben Rubinyanın tutacağı açıqlanmışdı.

Müəllif: Tural