“Ankara həmişə alternativlərə əl ata bilər!" - Hakan Fidan

Sanksiyalar və məhdudiyyətlər məsələsi Türkiyənin Avropa ölkələri və ABŞ ilə münasibətlərinin gündəliyindən əsasən çıxarılıb. Bir sıra məhdudiyyətlər qalmaqdadır, onların aradan qaldırılması üçün hüquqi prosedurlar tələb olunur. Bunlara CAATSA (“Düşmənlərə sanksiyalar vasitəsilə müqavimət haqqında” Qanun) sanksiyaları daxildir. Türkiyənin F-35 proqramında iştirakı mövzusu da var. Bu məsələlərdə sürətli və konkret nəticələrə ümid edirik. Müttəfiqlər bir-birinə qarşı sanksiyalar tətbiq etməməlidirlər.

Publika.az xəbər verir ki, bu barədə Türkiyənin xarici işlər naziri Hakan Fidan “TRT Haber” telekanalında bildirib. Nazir deyib ki, Türkiyə heç bir halda milli maraqlardan yayınmır.

“Ankara həmişə alternativlərə əl ata bilər və bütün tərəflər bunu dərk edir”, - deyə o vurğulayıb.

Xarici işlər naziri Türkiyənin beşinci nəsil KAAN təyyarələri üçün ABŞ təyyarə mühərriklərinin alınması ilə bağlı hər hansı problem gözləmədiyini bildirib: “ABŞ Konqresinin bu təşəbbüsə qarşı çıxması üçün son tarix başa çatıb. Proses davam edir”.

NATO-nun Ankara sammitinin nəticələrini şərh edən nazir hərbi-sənaye kompleksinin təhlükəsizlik sistemində əsas amillərdən birinə çevrildiyini deyərək, sammit zamanı ümumi dəyəri 50 milyard dollar olan müdafiə müqavilələrinin imzalandığını xatırladıb.

“Sammit həm təşkilati, həm də nəticə baxımından tarixi hadisəyə çevrilərək ən yüksək səviyyədə keçdi. Təhlükəsizlik məsələləri ilə bağlı müzakirələr NATO-nun gələcəyinə və trans-Atlantik münasibətlərdəki tendensiyalara yönəldi. Birbaşa Türkiyə müttəfiqlərinə tək bir ölkənin, o cümlədən müdafiə sektorunda nələrə nail ola biləcəyini nümayiş etdirdi. Türkiyənin hərbi-sənaye kompleksi, şübhəsiz ki, NATO üçün nümunədir”, - deyə H.Fidan vurğulayıb.

Nazir, həmçinin deyib: “Bu gün Avropa təhlükəsizliyini kimin qoruyacağını müəyyən etmək vacibdir: Aİ ölkələrinin özləri, və ya Türkiyə də daxil olmaqla daha böyük bir dövlətlər qrupu? Məsələn, Fransa Prezidenti Emmanuel Makronun açıqlamalarının əsas mesajı Aİ-nin Avropa təhlükəsizlik məsələlərində aparıcı rol oynamasıdır. Nəticə etibarilə, Fransanın aparıcı rol oynayacağı yeni bir təhlükəsizlik sahəsi yaratmaq istəyini və ya strategiyasını görürük”.

Ukrayna ilə Rusiya arasındakı müharibə mövzusuna gəldikdə, Türkiyə Xarici İşlər Nazirliyinin rəhbəri münaqişənin əhatə dairəsinin genişləndiyini qeyd edib.

“Bütün bunlar Qara dənizdəki vəziyyətə, o cümlədən gəmiçilik sahəsinə təsir göstərir. NATO sammitindən əvvəl Moskvaya son səfərim zamanı Rusiya tərəfinin mövqeyi ilə tanış oldum. Tezliklə Ukraynaya da səfər edəcəyəm. Türkiyə danışıqlar prosesinin bərpasını dəstəkləyir. Ankaranın təşəbbüsləri çox vacibdir. Bizim üçün ən vacib olan nəticədir”, - deyə H.Fidan fikrini yekunlaşdırıb.