İstanbul hazır deyil, bu qədər insan öləcək – Naci Görürdən dəhşətli zəlzələ proqnozu

İstanbul, alimlərin ehtimalını yüksək qiymətləndirdiyi mümkün dağıdıcı zəlzələyə hazır deyil.

Publika.az xəbər verir ki, bu barədə tanınmış türk seysmoloqu Naci Görür “RİA Novosti”yə verdiyi müsahibədə bildirib.

O, 2030-cu ilə qədər İstanbul bölgəsində 7 baldan çox zəlzələ ehtimalının 48% olduğunu təxmin edir. Lakin alim belə bir hadisənin dəqiq tarixini müəyyən etməyin mümkün olmadığını vurğulayıb.

Görür çərşənbə günü Çanaqqala əyalətinin Ayvacık kəndi yaxınlığında baş verən 3,9 bal gücündə zəlzələ ilə bağlı şərhində yeraltı təkanların Şimali Anadolu qırılmasının cənub hissəsində qeydə alındığını qeyd edib. O bildirib ki, bu, qırılmanın şimal hissəsində - İstanbul sahillərində güclü zəlzələ ehtimalının yüksək olduğunu göstərir.

"İstanbul zəlzələyə qətiyyən hazır deyil. Kimsə bunun əksini deyib məni inandıra bilməz. Bir şəhərin belə bir fəlakətə hazır olması üçün lap əvvəldən zəlzələyə davamlı binalar tikmək lazımdır... Biz zəlzələlərdən insanları qorxutmaq üçün deyil, onları daha təhlükəsiz evlər tikməyə təşviq etmək üçün danışırıq", - seysmoloq bildirib.

Görürə görə, İstanbul ərazisində baş verə biləcək zəlzələdən ölənlərin sayı 2023-cü ilin fevral ayında Türkiyənin cənub-şərqində baş verən dağıdıcı 7,7 və 7,6 bal gücündə zəlzələlərdən ölənlərin sayından çox ola bilər. Rəsmi rəqəmlər göstərir ki, o dövrdə 53 mindən çox insan həlak olub.

Mütəxəssislər müntəzəm olaraq Mərmərə dənizi bölgəsində yüksək seysmik risk barədə xəbərdarlıq edirlər. Daha əvvəl seysmologiya professoru və İstanbul Bələdiyyəsinin Zəlzələ Alimləri Şurasının üzvü Haluk Eyidoğan şəhər ərazisində 7 baldan çox güclü zəlzələnin qaçılmaz olduğunu, lakin onun vaxtını proqnozlaşdırmağın mümkün olmadığını bildirib. O qeyd edib ki, Şimali Anadolu qırılmasının qollarından biri Mərmərə dənizinin dibi boyunca, İstanbula yaxın ərazidə uzanır.

İstanbul Bələdiyyəsinin hesablamalarına görə, 7,5 bal gücündə zəlzələ şəhərdə ən azı 90.000 binanın uçmasına səbəb ola bilər ki, bu da təxminən 4,5 milyon insanın müvəqqəti yaşayış yeri ilə təmin olunmasını tələb edir. Sığorta şirkətləri belə bir ssenaridə iqtisadi zərərin 325 milyard dolları keçə biləcəyini təxmin edirlər.

Müəllif: Tural