İran Ermənistan güllərini Rusiyaya öz məhsulu kimi göndərirmiş - Üstü açıldı

“Rosselxoznadzor” (Baytarlıq və Fitosanitar Nəzarət üzrə Federal Xidmət) İrandan Rusiyaya ixrac üçün güllərin sertifikatlaşdırılmasını dayandırmasını istəyib.

Publika.az Rusiya mətbuatına istinadla xəbər verir ki, “Rosselxoznadzor” qeyd edib ki, 2026-cı ildə İslam Respublikasından göndərilən məhsulların həcmi ötən ilin eyni dövrü ilə müqayisədə xeyli çox olub. Sənədlərdə mənşə ölkəsi kimi İran göstərilib. Lakin məhsulların xarici xüsusiyyətləri və qablaşdırılması Ermənistandan göndərilən məhsullarla eyni olub.

Bu arada, 22 maydan etibarən Ermənistandan Rusiyaya gül göndərilməsi qadağan edilib.

Agentlik qeyd edib ki, "Rosselxoznadzor" əvvəllər İranı Ermənistan gül məhsullarına tətbiq edilən müvəqqəti məhdudiyyətlər barədə məlumatlandırıb.

İran tərəfindən cavab verilməməsi səbəbindən, Rusiya və AİB üzv dövlətlərinin ərazilərinin fitosanitar rifahının qorunması və “Rosselxoznadzor” tərəfindən tətbiq edilən qadağa və məhdudiyyətlərə riayət etmək məqsədilə xidmət ikitərəfli danışıqlar aparılana və məsələ aydınlaşdırılana qədər güllərin sertifikatlaşdırılmasının dayandırılmasını xahiş edib.

Qeyd etmək lazımdır ki, “Rosselxoznadzor” may ayından bəri Ermənistandan məhsulların idxalına tədricən məhdudiyyətlər tətbiq edir. Əvvəlcə yoxlamalar balıqçılıq məhsullarını, daha sonra çiçəkləri, tərəvəzləri, göyərtiləri və çiyələkləri əhatə edib. İyunun 2-də məhdudiyyətlər çəyirdəkli meyvələrə və üzümlərə, iyunun 12-də isə konservləşdirilmiş məhsullar istisna olmaqla, Ermənistan mənşəli demək olar ki, bütün bitki məhsullarına şamil edilib.

Müəllif: Tural