Türkiyə Aİ-nin qeyri-mümkün tələbini AÇIQLADI

Avropada yaranmış qaz qıtlığı fonunda Avropa İttifaqı Türkiyəyə müraciət edərək onun nəql etdiyi qazın Rusiya mənşəli olmadığını təmin etməyi xahiş edib, baxmayaraq ki, qazın mənbəyini müəyyən etmək demək olar ki, qeyri-mümkündür.

Publika.az xəbər verir ki, bu barədə Türkiyənin energetika və təbii sərvətlər naziri Alparslan Bayraktar "AHaber" telekanalına açıqlamasında bildirib.

"Avropalılar bizə gəlib Rusiya qazından başqa istənilən qazı təchiz etməyi xahiş edirlər. Lakin əsas məsələ odur ki, boru kəmərinə daxil olan istənilən qazın mənbəyi naməlumdur", – deyə nazir qeyd edib.

O vurğulayıb ki, Avropa ölkələri Rusiyadan qaz alışını dayandırmaq qərarından sonra ciddi iqtisadi və infrastruktur çətinlikləri ilə üzləşiblər. Bayraktarın sözlərinə görə, Avropa siyasətçiləri geosiyasi mülahizələrdən çıxış edərək öz dövlətləri üçün çətin şərtləri özləri yaradıblar.

İyul ayında Avropa İttifaqı Türkiyədən yeni müqavilələr əsasında blok ölkələrinə təchiz ediləcək qazın Rusiya mənşəli olmamasını tələb edib. Almaniyanın iqtisadiyyat naziri Katerina Rayxe qeyd edib ki, Brüssel Türkiyə ilə gələcək bütün sazişlərdən Rusiya qazının çıxarılmasında təkid edəcək.

Yanvar ayında Aİ Şurası Rusiya qazının Avropa İttifaqına tədarükünə dair 1 yanvar 2027-ci ildən qüvvəyə minəcək tam qadağanı rəsmi olaraq təsdiqləyib.

Hüseyn İbadlı