İran ABŞ-dan təzminat tələb edir

Hörmüz boğazının açılması ABŞ tərəfindən İslamabad memorandumunun pozulmasına görə kompensasiya ödənilməsindən asılıdır.

Publika.az "Tasnim"ə istinadla xəbər verir ki, bu barədə İranın xarici işlər naziri Abbas Əraqçi bildirib.

Diplomatın sözlərinə görə, Omanla Hörmüz boğazının hüquqi mexanizmi və idarə olunması, xüsusilə də gəmiçilik marşrutlarının müəyyənləşdirilməsi məsələsi ilə bağlı danışıqlar aparılır.

"Biz sazişin əldə olunmasına çox yaxınıq, lakin boğazın açılması həm də digər şərtlərdən, o cümlədən ABŞ-ın İslamabad memorandumunun müddəalarını pozmasına görə kompensasiya ödənilməsindən asılıdır", – deyə Əraqçi əlavə edib.

Qeyd edək ki, İran və Oman Hörmüz boğazı vasitəsilə gəmiçiliyi bərpa etməli olan saziş üzrə danışıqlar aparırlar.

Bölgədəki iki mənbənin məlumatına görə, bu, iki ölkə arasında 60 günlük müvəqqəti sazişi nəzərdə tutur; həmin sazişə əsasən, boğazdan və Fars körfəzinə yönələn bütün gəmi axını İran sularından keçən şimal marşrutu ilə həyata keçiriləcək. Hörmüzdən keçən və Ərəb dənizinə yönələn bütün çıxış trafiki isə İranla koordinasiya olunmaqla Oman sularından keçən cənub marşrutu ilə hərəkət edəcək.

Hüseyn İbadlı