Dəhşətli hərbi toqquşmalardan qalan yadigar - Türkiyə çimərliyində nə tapılıb?

Türkiyənin Çanaqqala vilayətinin Kəpəz qəsəbəsinin bələdiyyə çimərliyində partlamamış artilleriya mərmisi aşkar edilib.

Publika.az xəbər verir ki, bu barədə CNN Türk məlumat yayıb.

İlkin versiyaya əsasən, sursat Birinci Dünya müharibəsi dövründəki Dardanel əməliyyatına aiddir.

Obyekti dincələnlər görüb və dərhal polisə zəng ediblər. Təhlükəsizliyin təmin edilməsi məqsədilə hüquq-mühafizə orqanları sahil zonasını mühasirəyə alaraq ərazini nəzarətə götürüblər.

Çanaqqala polis idarəsinin minalardan təmizləmə üzrə mütəxəssisləri tapıntını götürərək ekspertiza aparılması üçün Kəpəz polis bölməsinə nəql ediblər.

"Çimərlikdə tapılan artilleriya mərmisi ehtimal ki, Çanaqqala döyüşləri dövrünə aiddir", – deyə telekanal yerli hüquq-mühafizə orqanlarına istinadla bildirib.

Dardanel döyüşləri (1915–1916-cı illər) Osmanlı imperiyası ərazisində Birinci Dünya müharibəsinin ən miqyaslı hərbi toqquşmalarından biri olub, Çanaqqala rayonu isə hələ də həmin hadisələrin çoxsaylı izlərini daşıyır.

Hüseyn İbadlı