Moskva Ermənistana görə həyəcan təbili çaldı: Aİİ dağılmaq təhlükəsi ilə üz-üzədir

Rusiya Ermənistanın Avropa İttifaqına yaxınlaşmasından narahatlığını açıq şəkildə ifadə edib.

Publika.az “İzvestiya” nəşrinə istinadən xəbər verir ki, bunu Rusiya xarici işlər nazirinin müavini Aleksandr Pankin deyib.

Onun sözlərinə görə, Avropa İttifaqının nümayəndələri müxtəlif ölkələrə səfərlər edir, qrup görüşləri keçirir və reallaşması mümkün olmayan vədlər verirlər.

Pankin bildirib ki, hazırda əsas vəzifə Avrasiya İqtisadi İttifaqının (Aİİ) dağılmasının qarşısını almaqdır. O, ittifaqa üzv dövlətlərdən birinin rəhbərliyinin mövqeyinin xüsusilə narahatlıq doğurduğunu vurğulayıb.

Rusiya rəsmisi Ermənistanın 2025-ci ildə ölkənin Aİ-yə üzvlük prosesinə başlanmasını nəzərdə tutan qanun qəbul etməsindən sonra Brüsselə yaxınlaşma kursunu davam etdirdiyini qeyd edib.

Pankin Aİİ-nin yaxın vaxtlarda müşahidəçi statusunda yeni ölkələrlə genişlənə biləcəyini də istisna etməyib. Onun fikrincə, Qərbin yaratdığı logistika və digər çətinliklər fonunda ittifaqın genişlənməsi əlavə iqtisadi və bürokratik yük yarada bilər.

Müəllif: Adəm Abbaslı